भजनी । नेपाल कम्युनिष्ट पार्टी (माओवादी केन्द्र) के अध्यक्ष पुष्पकमल दाहाल ‘प्रचण्ड’ भजनी बाढ पीडितहुकनके लाग राहतके प्याकेज लन्ना आश्वासन डेले बाटै ।
बुधके रोज भजनी नगरपालिकाके नवनिर्मित कार्यपालिका भवन उद्घाटनके क्रममे बोल्टी बारबार बाढके कारण यहाँ धनजनके क्षति हुइल कहटी बाढ प्रभावित क्षेत्र घोषणा करटी राहतके प्याकेज डेहुवाइक लाग विशेष पहल कैना बटैलै । हुलाकी सडक अन्र्तगत कन्द्रा लडियामे १० बरससे अलपत्र पुलके लाग सम्बन्धित मन्त्रालयमे तदारुकताके साथ काम कैना पहल कैना उहाँ बटैलै ।
राजनितिक प्रसङमे बोल्टी अध्यक्ष दाहाल कहलै, ‘मै टे एक ठो सपना डेख्ले रहु । कम्न्यूष्टहुकन एक करलपाछे देशमे राजनितिक स्थायित्व हुई, देशके विकास हुई, सामाजिक न्याय हुइना कहल रहे ।’ केपी ओलीहे दुई दुई चो अपने प्रधानमन्त्री बनाइल मने उहाँ नायक नाही खलनायक निकरलै अध्यक्ष कहलै ।
विर सहिद जोखन रत्गैया, विनोद चौधरीहे सम्झटी उहाँके बलिदानीसे सामानुपतिक समावेशीके व्यवस्था हुइल ओ संवैधानिक परिषद थारु आयोग बनल दाबी करलै । भजनी नगरपालिकाके नवनिर्मित भवनके उदघाटन करटी मिनि सिंहदरवार खडा हुइल मने सर्वसाधारणहुकन गुणस्तर सेवा आवश्यक रहल उहाँ बटैलै । भजनी नगरपालिकाके नवनिर्मित भवन उदघाटनके वडका पहुना रहल अध्यक्ष प्रचण्डहे नगर प्रमुख शेर बहादुर चौधरी भजनी नगरके समस्या समेटल ज्ञापनपत्र बुझैले रहिट ।