९ जेष्ठ २०८१, बुधबार May 22, 2024

तिंकर, छाङरुसम्म हेलिकोप्टरमार्फत गणक पुर्याउन माग

५ मंसिर २०७८, आईतवार
तिंकर, छाङरुसम्म हेलिकोप्टरमार्फत गणक पुर्याउन माग

धनगढी। कठिन बाटोको कारण दार्चुलास्थित व्यास गाउँपालिका–१ मा जनगणना गर्न समस्या भएपछि विद्यार्थी संगठनले गणकको लागि हेलिकोप्टरको व्यवस्था गर्न माग गरेका छन् । 
सुदूरपश्चिम प्रदेशमा विभिन्न राजनीतिक दल आवद्ध विद्यार्थी संगठनले तिंकर र छाङरुसम्म गणकलाई पु¥याउनका लागि हेलिकोप्टरको व्यवस्था गर्न राज्यसंग माग गरेका हुन । नेपाल विद्यार्थी संघ, अनेरास्ववियु क्रान्तिकारी, समानवादी विद्यार्थी युनियन लगायत १० विद्यार्थी संगठनले संयुक्त विज्ञप्ती जारी गर्दै छाङ्रु र तिंकरसम्म गणक पु¥याउन हेलिकोप्टरको व्यवस्था गर्न आग्रह गरेका छन् । यसैगरी, सीमा क्षेत्रका जनतासंगको सोधपुछ, पुराना तथ्य, तथ्याङ्कका आधारमा लिपुलेकदेखि नाभिङ, तिलसी (कालापानी) गुन्जी, नाभी, कुटी, जेलिङकाङ र लिम्पियाधुरासम्मको भू–भाग समावेश गरेर जनगणना गर्न सम्बन्धित निकायसंग माग गरेका छन् । 
भौगोलिक कठिनाइको नाममा पटक–पटक भारतसंग हारगुहार गरेर जनताको शीर निहु¥याउने लज्जास्पद कार्य रोक्न जिल्ला प्रशासन कार्यालय ध्यानाकर्षणसमेत गराइएको छ । छाङ्रु र तिंकरमा जनगणनाका लागि शुक्रबार टोली पैदल हिडेर त्यसतर्फ गएको छ । तर, कठिन बाटो पार गर्न नसकेपछि एक जना गणक फर्किएका छन् ।