हसुलिया। कैलालीको कैलारी गाउँपालिकामा लामो अवधिको जन्मान्तरका लागि सेटेलाइट क्लिनिक घुम्ती शिविर सोमबारदेखि सुरु भएको छ ।

कैलारी गाउँपालिका स्वास्थ्य शाखाको आयोजनामा वडा नम्बर १ स्थित मनाउँ आधारभूत स्वास्थ्य केन्द्रबाट घुम्ती शिविरको सुरुवात गरिएको हो । सो ठाउँमा भएको शिविरमा ३२ जना महिलाले लामो अवधिको जन्मान्तरका लागि सेवा लिएका छन् । पाँच वर्षसम्म जन्मान्तरका लागि ३१ जनाले इम्प्लान्ट र १२ वर्षसम्म जन्मान्तरका लागि एक जनाले आइयुसीडी सेवा लिएको स्वास्थ्य शाखा प्रमुख वीरेन्द्र सापकोटाले जानकारी दिए । मङ्गलबार बनकट्टा आधारभूत स्वास्थ्य केन्द्र र बुधबार गदरिया स्वास्थ्य चौकीमा शिविर आयोजना हुने जनाइएको छ ।

शिविरमा गाउँपालिकाका लेखापाल दीपेन्द्र चौधरी, स्वास्थ्य शाखाका कर्मचारीको उपस्थिति रहेको थियो । सिनीयर अनमी सृजना चौधरी र सिनीयर अनमी निरीक्षक बिन्द्रा आचार्यले सेवाग्राही महिलालाई सेवा प्रदान गरेका थिए ।