२३ मंसिर २०७९, शुक्रबार December 9, 2022

भुसे इट्टा भट्टा सञ्चालनके माग सहित ज्ञापनपत्र

१७ कार्तिक २०७८, बुधबार
भुसे इट्टा भट्टा सञ्चालनके माग सहित ज्ञापनपत्र

धनगढी । नेपाल भुसे इट्टा भट्टा व्यवसायी महासंघ (प्रस्तावित) सुदूरपश्चिम प्रदेशसे टमान माग सहित उद्योग, पर्यटन, वन तथा वातावरण मन्त्री मानबहादुर धामीहे ज्ञापनपत्र बुझैले बाटै ।
उद्योगहे नियमित रुपमे नविकरण प्रक्रियामे लैजैना ओ आधुनिक प्रविधिमे उद्योग लैजाइक लाग कम्तीमे ५ बरसके समय सिमा निर्धाण करे पर्ना लगायत माग सहित ज्ञापन पत्र बुझाइल हुइट ।
नेपाल भुसे इट्टा भट्टा व्यवसायी महासंघ कैलाली अध्यक्ष नारायण चौधरी उद्योगहे नियमित रुपमे नविकरण कैके छोट उद्योगीहुक्रनहे फेन आपन व्यवसाय सञ्चालके लाग सहज वातावरण मिला डेहे पर्ना बटाइल रहिट । उहाँ भुसे इट्टा भट्टा व्यवसायी फेन सक्कु प्रक्रिया पुगाके आपन उद्योग व्यवसाय सञ्चालन करलेसे फेन सरकार छोट व्यवसायीहुक्रनके रोजी रोटी खोसल बटैलै ।
यकर साथे अध्यक्ष चौधरी स्थानीय सीप, साधन स्रोत प्रयोग कैके सञ्चालित उद्योग बन्द हुइलेसे झन बेरोजगारी सृजना हुइना कहटी उद्योग सञ्चालनके लाग प्रदेश सरकार तत्काल वातावरण मिला डेहे पर्ना ध्यानकार्षण कराइल रहिट ।
ज्ञापनपत्र बुझ्टी वन तथा वातावरण मन्त्री धामी भुसे इट्टा भट्टा व्यवसायीहुक्रनके माग तथा समस्या प्रति संवेदनशील रहल कहटी उहाँ उ समस्याहे समाधन कैना बटाइल रहिट ।
प्रदेश सभा सदस्य बीरमान चौधरी फेन व्यवसायीहुक्रनके माग प्रति अपने गम्भीर रहल कहटी उ मागहे प्रदेश सरकार सम्बोधन कैना बटाइल रहिट ।
औद्योगिक प्रवद्र्धन बोर्डके २०७१ पुस १३ गते निर्णय अनुसार भुसे इट्टा भट्टा उद्योगहे आधुनिक प्रविधिसे सञ्चालन करे पर्ना कहटी २०७४ माघ मसान्तसम किल सञ्चालन कैना अनुमति डेहल रहे । हाल उ उद्योग व्यवसायके नविकरण प्रक्रिया रोकल बा ।
यहोर भुसे इट्टा भट्टा उद्योगी व्यवसायीहुक्रे औद्योगिक प्रवद्र्धन बोर्डसे आइइइ ओ इआइए सर्वेक्षण मापदण्ड पुरा कैके उद्योग सञ्चालन करल बटैले बाटै । कैलालीमे १८ ओ कञ्चनपुरमे २२ सहित ४० ठो भुसे इट्टा भट्टा उद्योग रहल बा । उ उद्योग बन्द हुइलेसे करिब ३ हजारसे ढिउर जाने रोजगारी गुमैना उद्योगीहुक्रे बटैले बाटै ।
कैलाली ओ कञ्चपुर जिल्लाके भुसे इट्टा भट्टा उद्योगी व्यवसायीहुक्रे उद्योग, पर्यटन, वन तथा वातावरण मन्त्रलायल पुगल रहिट ।