धनगढी । थारु सुपरस्टार प्रेम चौधरीके फेनसे फिल्मी क्षेत्रमे कमब्याक हुइल बाटै । दुई दशक आघेक फिल्म बौछारके गीत गाउँमे देख्नु गलियारमे देख्नु बोलके एकदमे चर्चित गीतके रिमेक भिडियो मार्फत उहाँ पहुना कलाकारके रुपमे फेनसे फिल्मी क्षेत्रओर डेख परल हुइट ।

उहाँ अभिनित थारु फिल्म जीवन एक लडिया हो, हटाइ कुहिरा, बौछार लगायत सुपरहिट रहल बा ।

उ बेला उहाँके अभिनयहे दर्शकहुक्रे खोब मन परैले रहिट । अब्बे उहाँ म्युजिक भिडियो मार्फत फेनसे फिल्मी क्षेत्रओर कमब्याक हुइल बटै । कलेसे उहाँक संगे नायिका अनुराधा चौधरी फेन पहुना कलाकारके रुपमे कमब्याक हुइल बटी । म्युजिक भिडियोमे नायक संगत चौधरी ओ मुस्कान चौधरीके मुख्य अभिनय रहल बा ।
म्युजिक भिडियो सेविल इन्टरटेइनमेन्ट यूट्यूब च्यानल मार्फत सार्वजननिक हुइल बा । निर्देशक हिरा चौधरी रहल भिडियाके छायांकन सतिश सिन्हाके रहल बा । रिमेक भर्जनमे राजकुश्मी ओ अन्नु चौधरीके स्वर रहल बा ।

ओस्टके थारु म्यूजिक भिडियो ‘चञ्चल चञ्चल मोर मन’ फेन शुकके रोज मल्टीफ्रेम स्टुडियोके युट्यूव च्यानलसे सार्वजनिक हुइल बा ।
म्युजिक भिडियोमे मुकुन्द जिसी, सुशिला कार्की, आर्यन ओ अन्जु कुश्मीके मुख्य अभिनय रहल बा । गणेश चौधरीके संगीत रहल गीत अन्जु कुश्मी ओ गणेश चौधरीके स्वर रहल बा ।
पोष्ट प्रोडक्सन मल्टीफ्रेम स्टुडियोके रहल बा । भिडियोके छायांकन रोशन चौधरी करले बाटै ।