धनगढी, २९ भदौ । कैलालीके कैलारी गाउँपालिका वडा कार्यालयसे प्रवाह करजैना सेवा सुविधा गाउँपालिकासे डेना हुइल बा ।
गाउँपालिका कार्यालयके मुख्य–मुख्य शाखाके महत्वपूर्ण कागजात, सरसमान सहित वडा कार्यालयमे तोडफोड ओ आगजानी हुइलपाछे कुछ दिनके लाग गाउँपालिकासे डेना जनाइल बा । वडा कार्यालयसे सेवा सुचारु हुइना कुछ दिन लग्ना हुइल ओरसे वडा कार्यालयसे प्रदान कैना सेवा गाउँ पालिकासे डेना निर्णय हुइल गाउँपालिकाके सूचना अधिकारी यगम कलेल जानकारी डेलै । अँट्वारके रोज बैठल कार्यपालिकाके बैठकसे उ निर्णय करल हो ।
ओस्टके कार्यपालिकाके बैठकसे जेनजी आन्दोलनके क्रममे सहदात प्राप्त हुइलहे शहिद घोषणा करेपर्ना, ओइनके परिवारहे राहत उपलब्ध कराई पर्ना, घाहिल हुउइयाहे निःशुल्क उपचारके व्यवस्था करेपर्ना, सार्वजनिक तथा निजि सम्पतिमे तोडफोड ओ आगजानी करुइयाके पहिचान करके कार्वाहीके लाग नेपाल सरकारसे आग्रह कैना फेन निर्णय कैगिल बा ।
भदौ २४ गते जेनजी आन्दोलनके नाउँमे प्रदर्शकारीसे गाउँपालिकाके सरसमान तोडफोड ओ आगजानी करलपाछे सेवा प्रवाहमे समस्या आइल बा ।
उहोँर गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरीके नीजि घरके सरसामानफे तोडफोड ओ आगजानी करल बावै । प्रदर्शनकारीहुक्रे पालिकामे धारल एक ठो स्कुटी ओ दुई ठो मोटरसाइकलफे जरैले बटै ।

इहे बिच ज्योति आयल स्टोरके सञ्चालक जय ठाकुरसे कैलारी गाउँपालिकाहे एक थान डेस्कटप कम्प्युटर सहयोग करले बटै । गाउँपालिकाहे कामकाजमे सहजता होए कहिके उहाँ गाउँपालिका अध्यक्ष राजसमझ चौधरीहे एक थान डेस्कटप कम्प्युटर हस्तान्तरण करल हुइट । हस्तान्तरण करेबेर प्रमुख प्रशासकीय अधिकृत खगेन्द्रराज जोशी ओ वडा नम्बर ३ के वडा अध्यक्ष सन्तराम चौधरीलगायतहे उपस्थिति रहे ।