सागर कुस्मी
धनगढी, ८ कुँवार । लडियक ढार परिवर्तन होके झुलुङ्गे पुलमे जोखिममे परल बा । कैलालीके गोदावरी नगरपालिका वडा नम्बर ९ धनचौरी ओ धनगढी उपमहानगरपालिका वडा नम्बर १७ ढुरझन्ना जोर्ना खुटिया लडियामे बनल झुलुङ्गे पुल जोखिममे परल हो ।

पुलके पुरुबओर लगटार लडिया कटान कैटी रहल ओरसे समयमे तटबन्ध नैकैलेसे झुलुङ्गे पुल आउर डटके जोखिममे पर्टी गैल स्थानीय लोग बटैठैं । ढुरझन्ना गाउँके पुर्व भलमन्सा आशाराम चौधरी, लडियामे समयमे तटबन्ध नैकैलेसे पुल पुहके जाइ सेक्ना बटैलैं । उहाँ कहलैं, ’यडि इ पुलके लाग समयमे तटबन्ध नैहुइ कलेसे काल्हिक दिनमे आवाजाही जैना बहुत समस्या हुइ । ओहेमारे सम्बन्धित निकायके समयमे ध्यान जाए ।’

ओस्टेके स्थानीय ज्ञानेन्द्र चौधरी, लडिया मन्से बेहिसाबसे गिट्टीबालु उत्खनन्से लडिया अपन ढार परिवर्तन कर्टी गैल बटैलैं । उहाँक कहाइ अन्सार स्थानी लोग पुल बचाइक लाग तटबन्धके माग कर्टी लडिया मन्से बालुगिट्टी उत्खनन्मे रोक फेन लगैले बटैं । लडिया मन्से धनगढी उपमहानगरपालिका गिट्टीबालुके रोयल्टी उठैटी आइल बा ।

स्थानीय विशाल बोहरा, पुल बचाइक लाग धनगढी उपमहानगरपालिकासे तत्काल तटबन्ध करे पर्ना माग रख्लैं । उहाँ तटबन्धके काम आघे नैबह्राइटसम धनगढी उपमहानगरहे गिट्टीबालु उठाइ नैडेना बटैलैं । स्थानीय हर्षराज राना पुल ओ स्थानीय लोगनके खेटुवा बचाइक लाग धनगढी उपमहानगरसे पहिलेसे तटबन्धके माग कैटी आइल बटैलैं । उपमहानगरसे तटबन्धके लाग आश्वासन डेना मने समयमे काम नैकरल ओरसे पुल जोखिममे पर्टी गैल ओ गाउँक स्कूल लगायत स्थानीयके जग्गा जमिन, खेटुवा कटान हुइटी गैल बटैलैं ।

इहे बीच धनगढी उपमहानगरपालिकाके डिभिजनल इन्जिनियर दिजराज भट्टके नेतृत्वमे खटल टोली सोम्मारके पुलके अनुगमन करले बा । अनुगमन पश्चात इन्जिनियर भट्ट पुल बचाइक लाग तत्काल लडियाके धार परिवर्तन करे पर्ना बटैलैं । ओकर लाग जिल्ला समन्वय समिति लगायत अन्य निकायसे समन्वय सहकार्य सहित आघे बह्रना बटैलैं । उहाँ पुल लगायत स्थानीय लोगनके खेटुवाहे डुबान कटानके समस्यासे बचाइक लाग जनताके तटबन्ध कार्यक्रम सहित लावा योजनाके लाग फेन पहल कैना प्रतिवद्धता जनैलैं ।

अनुगमन कार्यक्रममे धनगढी उपमहानगरपालिका वडा नम्बर १७ के वडा अध्यक्ष माधवराज राना, उपमहानगरके कर्मचारी, बरघर, भलमन्सा, समाजसेवी, वुद्धिजिवी ओ ढुरझन्नाबासी सहभागि हुइल रहिंट ।