सागर कुस्मी
धनगढी, १ कुँवार । कैलाली विद्या निकेतन धनगढी अपन २५ औं स्थापना दिवसके अवसरमे एक समारोहके बीच दृष्टि फाउण्डेशन धनगढीहे खाद्य सामग्री ओ स्टेशनरी प्रदान कैले बा ।

सहारा विहीन महिलाहरु एवम् अनाथ बालबालिकनके आश्रय स्थल बन्टी आइल दृष्टि फाउण्डेशनमे हाल ६१ जाने महिला ओ १६ जाने बालबालिका आश्रित बटैं ।

वि.स.२०५६ सालमे स्थापना हुइल कैलाली विद्या निकेतनमे हाल कक्षा नर्सरीसे कक्षा १० सम अध्यापन हुइठ । विद्यालयके संस्थापक प्रिन्सिपल टोपेन्द्र शाह विद्यालय २५ औं वसन्त प्रबेश करल इ शुभ अवसरमे विद्यालयहे स्थापना कालसे हालसम अनवरत रुपमे योगदान पुगैटी रहल संस्थापक, संचालक, विद्यालय व्यवस्थापन समिति, अभिभावक, शुभचिन्तक, समाजसवी, शिक्षक शिक्षिका, विद्यार्थीवर्ग सक्कुहुन आभार प्रकट कैलैं । प्रिन्सिपल शाह इ बरस रजत बरस फेन हुइल ओर्से विद्यालय आन्तरिक सदनात्मक प्रतियोगिता, तहगत प्रतियोगिताके अतिरिक्त अन्तर विद्यालय स्तरीय विविध विधाके प्रतियोगिता, पूर्व विद्याथी मिलन कार्यक्रम सहित भव्यताके साथ इ बरस रजत जयन्ती मनैना जानकारी डेलैं ।

निजी तथा आवासीय विद्यालय अर्गनाइजेशन (प्याब्सन) सदस्य विद्यालय समेत रहल कैलाली विद्या निकेतन इ क्षेत्रमे गुणस्तरीय शिक्षा प्रदान करटी आइल उत्कृष्ट विद्यालयके रुपमे परठ् ।