२७ आश्विन २०८१, आईतवार October 13, 2024
हसुलिया, ३१ भदौ । कैलाली जिल्लाके कैलारी गाउँपालिकासे टमान वडामे कार्यरत रहल ओ यिहे गैल आर्थिक बर्षमे अवकास पाइल स्वास्थ्य स्वयं सेविकन नगद एक लाखसहित ओ दोसल्ला ओढाके विदाई कैगिल बा ।
सोम्मारके रोज कैलारी गाउँपालिकाके आर्थिक वर्ष २०८०÷०८१ सालमे स्वास्थ्य शाखा अन्र्तगत सम्पन्न कार्यक्रमके वार्षिक समिक्षा तथा योजना तर्जुमा कार्यक्रम टमान वडामे कार्यरत रहल ओ यिहे गैल आर्थिक वर्षमे अवकास पाइल महिला स्वास्थ्य स्वयं सेविकाहुकनहे नगद सहित स सम्मान विदा कैगिल हो ।
अवकास पाके सम्मानित हुइलमे कैलारी–२ उजलीसेमरामे कार्यरत रहल भोजलीदेवी चौधरी रहल बटी । उहाँ २०५१ सालसे महिला स्वास्थ्य स्वयं सेविकाके रुपमे सेवा प्रदान करटी आइल रही । ओस्टेक करके २०५१ सालसे सेवा प्रदान करटी आइल कैलारी–५ सुशिला देवी चौधरी, २०५२ सालसे सेवा प्रदान करटी आइल वडा नम्बर ६ बनकट्टाके लहिया थारु, २०५१ सालसे सेवा प्रदान करटी आइल वडा नम्बर ६ खरुवाखेराके दुसर लहियादेवी थारुफे नगद एक लाखसहित सम्मानित हुइल बटी ।
ओस्टेक करके २०५२ सालसे सेवा प्रदान करटी आइल वडा नम्बर ७ भुइयाँफाँटाके कल्टीदेवी चौधरी, २०५२ सालसे सेवा प्रदान करटी आइल वडा नम्बर ७ नारायणपुरके सोनियादेवी चौधरी ओ २०५२ सालसे सेवा प्रदान करटी आइल कैलारी–३ के दुरपति देवी चौधरीहे नगद ओ दोसल्लासहित स–सम्मान विदाई कैगिल हो ।
विदाई तथा सम्मान कार्यक्रममे गाउँपालिका उपाध्यक्ष भगवतीकुमारी चौधरी महिला स्वास्थ्य स्वयं सेविकाहुक्रे अपन महत्वपूर्ण जीवनकालमे विना तलब निश्वार्थ भावनासे सेवा प्रदान कैना मने अवकाश पाईबेर खाली हात जैना हुइल ओरसे कैलारी गाउँपालिकाके कार्यपालिकाके बैठकके निर्णय अनुसार आबसे अवकास पैना हरेक महिला स्वास्थ्य स्वयं सेविकाहुकनहे नगद एक लाख सहिट विदाई करल बटैली ।
उहाँ कहली, ‘स्वास्थ्य क्षेत्रमे महिला स्वास्थ्य स्वयं सेविकाहुकनके भारी डेना बा । गाउँघरमे कोई दुख विमार परल ओ महिला सुत्केरी हुईबेर रातदिन जारघाम नैकहिके सेवा प्रदान करठै ।’ सम्मान कार्यक्रममे गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्दराज जोशी, वडा नम्बर ६ के वडाके अध्यक्ष प्रेमबहादुर चौधरी, स्वास्थ्य कार्यालयके निमित्त प्रमुख ओलर्ट नारायण चापागाँईसे चेक हस्तान्तरण, दोसल्लासहित स सम्मान करल रहिट ।
कैलारी गाउँपालिकासे १२५ जाने महिला स्वास्थ्य स्वयं सेविका कार्यरत रहल स्वास्थ्य शाखा प्रमुख नरेशकुमार चौधरी बटैलै ।
