धनगढी, १८ भदौ । पश्चिम नेपालका थारू समुदायले मनाउँदै आएको पर्व अँट्वारीमा कैलारी गाउँपालिकाले दूई दिन स्थानीय विदा दिएको छ ।
थारु समुदायको सांस्कृतिक तथा सामाजिक पर्वको रुपमा रहेको अँट्वारी पर्व यस वर्ष भदौ २३ गते परेको छ । गाउँपालिकाले पर्वको अवसरमा भदौ २३ र २४ गते स्थानीय बिदा दिने निर्णय गरेको छ ।
सुदूरपश्चिम प्रदेश सरकार, आन्तरिक मामिला तथा कानून मन्त्रालयले भदौ २३ गते सार्वजनिक बिदा दिएकोले गाउँपालिकाको निर्णय अनुसार भदौ २४ गते थप १ दिन बिदा दिएको गाउँपालिका प्रमुख प्रशासकीय अधिकृत खगेन्द्रराज जोशी बताए ।
भदौ २३ र २४ गते कैलारी गाउँपालिका भित्रका सम्पूर्ण सरकारी कार्यालय, शिक्षण संस्था, बैंक तथा वित्तीय संस्थाहरुमा स्थानीय सार्वजनिक बिदा रहने जनाएको छ ।

हरेक वर्ष कृष्ण जन्माष्टमीपछिको दोस्रो साताको आइतबार तथा कुशेऔंसी पछिको पहिलो आइतबारका दिन अँट्वारी पर्व मनाइन्छ ।
अँट्वारी पर्व कुशे औंसी पछिको पहिलो आइतबार र भाद्र शुक्ल पक्षको पहिलो आइतबार थारु समुदायको अँट्वारी पर्व मनाइने गरको थारु अगुवाहरु बताउछन् ।
अँट्वारी मुलतः थारु समुदायका पुरुषले मनाउने पर्व हो । यो पर्वमा पुरुषहरुले आफ्नो दिदी बहिनीको दीर्घायूको कामना गर्दछन् । कैलाली, कञ्चनपुर, बर्दिया र दाङ जिल्लाका थारु समुदायले पुस्तौंदेखि अँट्वारी पर्व मनाउदै आईरहेका छन् ।
अँट्वारी पुजामा अण्डीक रोटी, काँक्रो, दही, केरा, अम्बा लगायत अग्रासनका लागि झिकेर पूजा गरिन्छ । त्यसको भोलिपल्ट बिहान पाँच अथवा सात प्रकारका गेडागुडीयुक्त तरकारी र भातको फरहार गरिन्छ ।
फरहारपछि आफ्ना विवाहित चेलीबेटीलाई अग्रासन दिन जाने चलन रहेको छ । अँट्वारी माइतीले आफ्ना चेलीबेटीलाई सम्मान दिने तथा दाजुभाई र दिदीबहिनीबीच मायाप्रेम साट्ने पर्वका रूपमा स्थापित छ ।