प्रविन बौखाही
हसुलिया, ९ कुँवार । कैलालीके कैलारी गाउँपालिका वडा नम्बर ५ मनिकापुरमे बाढी पीडित बस्तीहे स्थायित्वके लागके लाग जनसभा कार्यक्रम हुइल बा ।
मनिकापुर बाढी पीडित बस्तीके आयोजनामे हुइल कार्यक्रमके बर्का पहुनामे सुदूरपश्चिम प्रदेशके भूमि व्यवस्था कृषि तथा सहकारी मन्त्री रामेश्वर चौधरी ओ प्रदेश सभा सदस्य घनश्याम चौधरी रहल रहिट ।
कार्यक्रमहे सम्बोधन कैटी मन्त्री चौधरी बाढ प्रभावित बस्ती तथा अव्यवस्थित बसोबासके सवालमे कानुनी नीति नियम विधि, पद्धती भित्तर रहिके स्थानीय सरकारहे निस्सा, लाल पुर्जा डेना कानुनी व्यवस्थाा रहल बटाइल रहिट । ओस्टके उहाँ बाढी पीडित बस्तीहे प्रदेश सरकारसे निस्सा डेहुवाइना तत्पर रहल बटाइल रहिट । ओस्टके उहाँ कहोरोसे बाधा अवरोध अइलेसे आपनहे जानकारी करैना आग्रह करटी उहाँ उ बाधा अवरोधहे हटैना फेन प्रतिवद्धता व्यक्त करल रहिट । बाढी पीडितहे निस्साके लाग उहाँ राष्ट्रिय भूमि आयोगसे फेन पहल कैना बटाइल रहिट ।

ओस्टके प्रदेश सभा सदस्य घन श्याम चौधरी बाढी पीडीत बस्तीहे वन डिभिजन कार्यलय, जिल्ला सिडीयो कार्यलयसे बारम्बार बिना बिकल्पके बर्खा सिजनमे बस्ती उठैना सुचना निकर्ना करटी आईल बटैलै । उहाँ बाढी पीडित बस्ती विना विकल्प नै उठैना कहटी प्रदेश सरकारहे ध्यानकार्षण फेन कराइल बटाइल रहिट । ओस्टके उहाँ बाढी पीडित बस्तीहे बचाईक लाग स्थानीय सरकार, प्रदेश सरकार ओ संघीय सरकारसे सहकार्य कैना जरुरी रहल फेन बटाइल रहिट ।
कैलारी गाउँपालिकाके उपाध्यक्ष भगवती चौधरी बाढी पीडित बस्ती तथा अव्यवस्थित बस्तीके स्थानीयहे निस्सा ओ लालपुर्जाके लाग नापजोखके कार्य आघे बह्रल बटाइल रही । उहाँ सक्कु वडामे नापजोख हुइटी रहल जानकारी डेटी कुछ दिनमे मनिकापुर बाढी प्रभावित बस्ती ओर फेन टोली पुग्ना बटाइल रही ।

वडा नम्बर ५ के वडा अध्यक्ष विष्णु प्रसाद चौधरी बाढी पीडित बस्तीबारे स्थानीय सरकार जानकार रहल बटाइल रहिट । उहाँ बाढी पीडितके पीडा आपन पीडा रहल बटैटी स्थानीय सरकारसे निस्सा ओ लालपुर्जा फेन हाली उपलब्ध करैना बटाइल रहिट ।
कार्यक्रम हरिचरण थारु(करण)के घरगोसियाइमे हुइल रहे । कार्यक्रममे वडा नम्बर ५ के वडा सदस्य, नेपाली काँग्रेसके प्रेम चौधरी, नेकपा(एमाले) के गणेश चौधरी, नेकपा (माओवादी केन्द्र)प्रदेश सचिवालय सदस्य परशु चौधरी(मिसन), नेपाल कम्युनिष्ट पार्टीके आर्यन सी, बैजपुर गाउँ भलमन्सा ओम प्रकाश चौधरी, सपना शिविरके भलमन्सा जगीलाल चौधरी, मंझराके भलमन्सा लगायत बाढी प्रभावित बस्तीहे हाली स्थायित्वके माग कैटी प्रदेश सरकार ओ स्थानीय सहकारहे आग्रह करल रहिट । कार्यक्रमके सञ्चालन कविता चौधरी करले रही ।