९ जेष्ठ २०८१, बुधबार May 22, 2024

युवनहे लक्षित कैके साहित्य लेखन प्रशिक्षण हुइना

१३ आश्विन २०७९, बिहीबार
युवनहे लक्षित कैके साहित्य लेखन प्रशिक्षण हुइना

धनगढी । थारु समुदायके युवनहे लक्षित कैके गजल तथा साहित्य लेखन प्रशिक्षण कार्यक्रम हुइना हुइल बा ।

हरचाली साहित्यिक त्रैमासिक पत्रिकामार्फत कैलाली ओ कंचनपुरके थारु घन बस्ती रहल गाउँ ठाउँमे गजल प्रशिक्षण हुइ लागल आयोजक जनैले बा ।

डसियाके बिदा हुइल समयहे सदुपयोग कैके, युवनमे रहल प्रतिभाहे प्रस्फुटन कैना उद्देश्यसे इ प्रशिक्षण कार्यक्रमके योजना लानल हरचाली प्रकाशन टीम जानकारी डेहल ।

हरेक मनैनमे कुछ ना कुछ प्रतिभा नुकल रहठ । उ प्रतिभाहे समाजमे प्रस्तुत करक लाग इ कार्यक्रमके योजना करे लागल पत्रिकाके प्रधान सम्पादक सागर कुस्मी बटैलैं ।

उहाँ कलैं, इ प्रशिक्षण कार्यक्रमसे युवा पुस्टनके साहित्यमे रुचि बरहाइक लाग ओ साहित्यमार्फत समाजमे थारु भासा साहित्यके विकास हुइक लाग कार्यक्रम हुइ लागल हो ।

अझ्कल सामुदायिक स्कुल डसियाके बिदा हुइल बा । इ समयमे अब्बे ढेर विद्यार्थी खाली बैठल बटैं । ओहेमारे समयहे सदुपयोग कैके साहित्यिक गतिविधि कैके कुछ अपनठन रहल ज्ञानगुणके बात सिखैना ओ सिख्ना होए कहिके इ कार्यक्रमके अभियान चलाइल सम्पादक कुस्मी बटैलैं ।

डसिया ओ डेवारीके बिदामे कैलाली ओ कंचनपुरके कुछ पालिकामे इ कार्यक्रम हुइ । विशेष कैके गजल, मुक्तक, कविता, ओ संस्मरण विधामे केन्द्रित होके प्रशिक्षण हुइना बटागैल बा । कार्यक्रममे एक सिप्टमे २० जहन युवनहे ढारके प्रशिक्षण संचालन हुइ ।

प्रशिक्षणके बाड लगटार लेखनमे सक्रिय हुइल लेखक ओइनहे भेला कराके वृहत साहित्य सम्मेलन कैना आयोजकके योजना बटिस । गाउँ समाजमे रहल ढेरहस युवा कौनो अवसर नैपाके अपन प्रतिभा डेखाइ नैपाके मनके भिट्टर नुकल रठिन ।

नुकल प्रतिभाहे खोजके कार्यक्रमके कैके लावा लेखक ओइनहे आघे बर्हैना, ओइन्के करियर मजा बनैना आयोजक बटैले बा । इहिसे आघे फेन हरचाली साहित्यिक त्रैमासिक पत्रिकामार्फत टमान ठाउँमे गजल, मुक्तक, कविता, ओ उदघोषण तालिम कर्टी आइल बा ।

तालिमलेके लगटार साधना कर्टी आइल कैलाली ओ कंचनपुरके ढेर युवा ओइने गजल, मुक्तक, कविता ओ संस्मरण संग्रह फेन निकार सेकल सम्पादक कुस्मी जानकारी डेलैं । मेहनत कैलेसे हरेक काममे सफलता हाँठ पारे सेक्जाइठ ।