१४ फाल्गुन २०८०, सोमबार February 26, 2024

बाढ पीडितहे खाद्यान्न अभाव

११ आश्विन २०७९, मंगलवार
बाढ पीडितहे खाद्यान्न अभाव

धनगढी । कैलालीके भजनीके बाढपीडितहे खाद्यान्नके अभाव हुइल बा ।
बाढसे डुबानमे परलपाछे अन्नपात नष्ट हुइल बाढपीडितहे अब्बे परिवारके पेट कैसिक पल्ना कहिके पिरसे सटैले बा । इहे कुँवार १ गते आइल बाढसे भजनी नगरपालिकाके सक्कु वडामे क्षति हुइल हो । बाढसे घर डुबानमे परलपाछे अधिकांशके घरमे रहल अन्नपात भिजके नष्ट हुइल बा । कतिपयके घर भत्कल बावै कलेसे कतिपयके घरमे अब्बे फेन बैठे सेक्ना अवस्था नैहो ।
बाढसे घरमे रहल अन्न कुछ पुहल, कुछ भिजके नष्ट हुइलपाछे अधिकांशके घरमे चुल्हा बरे नैसेकल उहाँहुक्रनके गुनासो रहल बा । भजनी सोनाहफाँटाके गणेश विक आपनहे परिवारके पेट कैसिक पल्ना कहिके चिन्तामे रहल बटैलै ।
‘नेपालीके बर्का टिहुवार डशै लच्क्यइटी बा, अन्य ठाउँके नागरिक डशैके तयारी करे लग्लेस फेन हम्रे भर पीडामे बाटी,’ विक कहलै, ‘हम्रहीनहे टरटिहुवार मनैनासे परिवारके पेट कैसिक भर्ना कना पीडासे सटैले बा, खाद्यान्नके जोहो कैसिक कैना कना सोचे सेकल नैहुइटी ।’
अन्नपात नैहुइलपाछे दातासे डेहल चिउरा, चाउचाउके भरमे उहाँहुक्रे बैठल बाटै । भजनीके नन्दलाल डगौराके घरमे रहल सक्कु सामान नष्ट हुइलपाछे उहाँहे आब का कैना अन्योल परल बा । उहाँके अन्न बाढसे पुहालैगिल । उहाँ राहत फेन पैले नैहुइट । ‘घरमे भण्डारण रहल अन्न सक्कु बाढसे नष्ट करडेहल, खेट्वामे रहल धानबाली फेन नोक्सान हुइल बा,’ डगौरा कहलै्, ‘आब भोकमरीसे सटैना डर बा, मजदूरी करे जाउँ कलेसे फेन काम नैमिलठ्, घरमे अन्न नैहो कैसिक भोक मेटैना हो ?’
स्थानीय पहलमानसिंह डगौराके फेन घरके सरसामान, खेट्वामे रहल बाली सक्कु सामान नष्ट हुइल बा । सात जनहनके ओहकान परिवार फेन राहतके नाउँमे चिउरा किल पैले बाटै । ‘एक अँठ्वारसम हुलाकी सडकमे बैठ्ली, एक अँठ्वारपाछे घर आइल बाटी, अन्नके नाउँमे घेरमे कुछ नैहो,’ उहाँ कहलै, ‘आब राहत पाइलाछे खाब कना आशा बा, सहयोगीहुक्रे डेलेसे खाब नैटै इ बरस भोकमरी हुइ, खेट्वामे रहल धानबाली फेन नोक्सान हुइल बा, घरमे फेन अन्न नैहो ।’
जनकपुरके कृष्ण चौधरीके चार जनहनके परिवार बा । उहाँहुक्रे फेन राहतमे चिउरा ओ पानी किल पैले बाटै । नेपाली सक्कु जाने डशै मनैना तयारी करटी रहल बेला उहाँ राहतमे चाउर, दाललगायतके खाद्यान्न डेलेसे सहज हुइना बटैठै ।
‘डशै आइ लागल बा, सक्कुजाने डशैके तयारीमे बाटै, मने हम्रे भजनीवासी बाढपाछेके दुर्गन्ध ओ घर सरसफाइमे जुटल बाटी,’ उहाँ कहलै्, ‘टरटिहुवारमे रमाइलो टे डुरके बात हो, हम्रहीनहे दुई छाक कैसिक खैना कना समस्या आइल बा ।’
नगरपालिकासे बाढपीडित सात हजार ढिउर परिवार रहल ओरसे राहत लगायतके कार्यके लाग सक्कु जनहनहे अपिल करले बा । पालिकासे तत्काल ढिउर समस्यामे रहलहे खानाके लाग मेस सञ्चालन ओ खाद्यान्न वितरण करटी हरल बा । यकर साथे प्राथमिकतामे राखके राहतके कार्यक्रम लाने लागल जनाइल बा ।
वडा नं ८ के वडाध्यक्ष पंकज चौधरी राहत वितरण कार्य सुरु करल बटैलै । ‘हम्रे ढिउर समस्या रहलहे प्राथमिकता डेके खाद्यान्न वितरण करले बाटी, सहयोगी दातासे डेहल खाद्यान्न समुदायमे वितरण हुइटी रहल बा,’ उहाँ कहलै, ‘हम्रे नागरिकके समस्यामे सँगसँगे बाटी, हजारौँ नागरिक प्रभावित हुइल ओरसे सोचल जस्टे करे सेकल नैहो, टौन फेन हम्रे प्रयासरत बाटी ।’