धनगढी,१८ भदौ । मेलमिलाप सम्बन्धी आठ दिवसिय आधारभूत तालिम शनिच्चरके रोज धनगढीमे सम्पन्न हुइल बा ।
दिगो शान्तिका लागि उन्नत सम्बन्ध कना मुल नाराके साथ प्राकृतिक श्रोत द्वन्द्व रुपान्तरण केन्द्र, नेपालके आयोजनामे हुइल तालिम समापन कार्यक्रममे जिल्ला अदालत कैलालीके जिल्ला न्यायधिश माननीय ओमप्रशाद अर्याल वडका पहुना रहिट । कार्यक्रममे बोल्टी उहाँ मेलमिलापकर्ता एक न्यायधिशके रुपमे काम करटी रहल बटै ।
प्रमाणपत्र लेसेकलपाछे अपनेहुक्रे न्यायधिश हुई, उहाँ कहलै, ‘स्थानीय तहसे मेलमिलापके लाग तोकल बेला, दुई ठो विवादित पक्ष अपनेहे तोक्लेसे, रोज्लेसे उ विवादके लाग अपनेहुक्रे न्यायधिश सरह हुई । अपनेहुक्रे दुनु पक्षके जित जित मेरिक फैसला करबी ।’
एक ठो न्यायधिशके हैसियत जस्टे जिल्ला अदालतके इजलासमे बैठके फैसला कैना अधिकार टे नइहो । मने जिल्ला अदालतसे मिलैना कुछ अधिकार अपनेहुक्रे पैले बटी, उहाँ कहलै ।
उहाँ कहलै, ‘मुद्दा मिलापत्रके लाग अदालतमे आइबेर बहुट पैसा, समय खर्च हुइठ । उहीहे सहज करेक लाग अपने गाउँ ठाउँमे कम खर्चमे कम प्रयासमे थोरै समयमे कम क्षतिमे विवादके समाधन करेसेकक्ठी ।’

जिल्ला अदालतमे हेरेबेर जटराफे कामके भारी बा । उच्च अदालतमे १० बरससम फैसला नइहुइठ । सर्वाेच्च अदालत ओर मुद्दा, रित लेके गैलेसे पाला नइआइठ । नातियाके जलमफे हुजैठै माननीय न्यायधिश अर्याल कहलै ।
मेलमिलापकर्ता संयमित हुइ परठ, ओइनहे आक्षेप लगैही, झगरा करही, न्यायधिश हुइक लाग सबसे सुने सेक्ना क्षमता हुई परठ । जे जा कहलेसेफे आरोप लगैलेसेफे सहुइया केल मेलमिलाप कराई सेक्ना उहाँ बटैलै ।
जिल्ला न्यायधिश अर्याल क्षेत्राधिकार भिटर पर्ना मुद्दा केल मिलैना मेलमिलापकर्ताहुकन सुझावफे डेहल रहिट । उहाँ कहलै, ‘फौजदारी मुद्दामे सरकारी वकिलहेफे कार्वाही हुइल बा । सरकारवादी मुद्दा जग्गाके विवाद, बलात्कारके मुद्दा, चोरी डाकाके मुद्दा हो । ओसिन मुद्दामे सरकारी वकिल प्रहरीसे मिलापत्र करके जाउ कहेबेर एसपी, एसएपी कार्वाहीमे परल बटै । सरकारी वकिल कार्वाहीमे परल बटै । नइहुइना काम करे नइपरठ । मिलाई पैना मुद्दा केल मिलाई, सरकारवादी मुद्दा नमिलाई, तालिममे सिखल चिज प्रयोग करी ।’
न्यायधिक कहलै,‘अपनेहुक्रेफे गाउँके टोलके समाजके सफल ओ मजा न्यायधिश बनके सेवा करी । यी काम करेबेर थोरिक पैसा धारल बा । मने सेवाहे भर पेशा नबनैबी । कबु–कबु सेवाफे करे परठ ।’
कार्यक्रममे मेलमिलाप सम्बन्धी आठ दिवसिय आधारभूत तालिमके मुख्य प्रशिक्षक तथा प्राकृतिक श्रोत द्वन्द्व रुपान्तरण केन्द्र, नेपालके सहजकर्ता दिपु चौधरी, वि पोलिटेक्निक संचालक हिरा बोहरा भण्डारी, तालिममे सहभागीके ओरसे चुडामणी ओली, ममता जैशी लगायत मन्तव्य व्यक्त करले रहिट ।
प्राकृतिक श्रोत द्वन्द्व रुपान्तरण केन्द्र, नेपालके पश्चिम संयोजक बल्लु चौधरीके अध्यक्षतामे हुइल समापन कार्यक्रममे उहाँ सुदूरपश्चिम ५ ओ बाँके बर्दिया सहिट सात जिल्लाके ४० जनहनहे फाटल मन सिलैना डाक्टर बनाइल बटैलै । साथे उहाँ तालिममे सिखल ज्ञानसीप अनुसार गाउँघरमे मेलमिलाप करैना आग्रह करल रहिट ।
कार्यक्रमके संचालन प्राकृतिक श्रोत द्वन्द्व रुपान्तरण केन्द्र, नेपालके सजहकर्ता बन्धु प्रसाद चौधरी ओ स्वागत गंगा सुनार करले रहिट ।