३२ असार २०८१, सोमबार July 15, 2024

अनुग्रह मण्डली एजी चर्चके भवन उदघाटन

१६ भाद्र २०७९, बिहीबार
अनुग्रह मण्डली एजी चर्चके भवन उदघाटन

हसुलिया । कैलालीके कैलारी गाउँपालिका वडा नम्बर ७ मे निर्माण सम्पन्न हुइल अनुग्रह मण्डली एजी चर्चके भवन उदघाटन कैगिल बा ।
गाउँपालिकाके गत आर्थिक बर्ष ०७८÷०७९ मे विनियोजित बजेटसे सम्पन्न हुइल उ भवनके उदघाटन सुदूरपश्चिम प्रदेश चर्च समन्वय समितिके उपाध्यक्ष एवम पास्टर ज्ञानबहादुर चौधरी, कैलारी गाउँपालिकाके अध्यक्ष राजसमझ चौधरी ओ गाउँपालिका उपाध्यक्ष भगवतीकुमारी चौधरी लाल, निला ओ उज्जर रेवन काटके तिनु जाने संग्गे उदघाटन करल रहिट ।
चर्चके लौव भवनके उदघाटन कार्यक्रममे बोल्टी कार्यक्रमके वडका पहुना रहल सुदूरपश्चिम प्रदेश चर्च समन्वय समितिके उपाध्यक्ष एवम पास्टर ज्ञानबहादुर चौधरी जीवनके खास लक्ष्य समाज सेवा कैना ओ स्वर्गमे बाट बटाइल रहिट । ओस्टेक उहाँ विश्वके इतिहास चर्चसे सुरु हुइलफे बटैलै ।
कार्यक्रमके विशिष्ट पहुना कैलारी गाउँपालिका अध्यक्ष राजसमझ चौधरी सक्कु धर्महे सम्मान व्यवहार करेपर्ना बटैले बटै । चर्च एक ठो पवित्र स्थल रहल कहटी ठाउँ ठाउँमे बनैनासेफे एक वडामे एक गाउँमे व्यवस्थित रुपमे बनैलेसे मजा हुइना बटैलै । उहाँ चर्च लगायत सक्कु धर्महे पालिकासे सम्मान व्यवहार कैनाफे प्रतिवद्धता जनैलै ।
कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी कौनो धर्म हत्या हिंसा नइसिखैना बटैली । उहाँ कहली, ‘कुहीहे भेदभाव कैना व्यक्तिके आचरणमे भर परठ । सक्कु धर्ममे उद्देश्य सत्यके डगर डेखैना हो । उहाँ भवन निर्माणके क्रममे अनुगमन करेबेर मजासे बनाइल ओरसे धन्यवाद डेटी अइना दिनमे चर्च विकासके लाग संघ, प्रदेशसे समन्वय कैना प्रतिबद्धता जनैली । ओस्टेक कार्यक्रममे विशिष्ट पहुना कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम अपने सक्कु धर्म संस्कृतिके संरक्षण कैना कहटी शुभकामना मन्तव्य व्यक्त करल रहिट । ओस्टेक वरिष्ठ पाष्टर भागीराम चौधरीफे मन्तव्य व्यक्त करल रहिट । स्वागत मन्तव्य उपभोक्ता समिति अध्यक्ष प्रकाश चौधरी करल रहिट । कार्यक्रममे गाउँपालिकाके योजना शाखा प्रमुख सन्तोषकुमार चौधरी, वडा सदस्य टुनीराम चौधरी, दलित महिला सदस्य आरती विक, टमान समाजसेवी, मण्डलीके पाष्टर लगायतके सहभागिता रहे, कलेसे संचालन कमला चौधरी करले रहिट ।