धनगढी, १२ भदौ । नेपाली कांग्रेसके नेतृ तथा परराष्ट्रमन्त्री मन्त्री आरजु राणा देउवा गौरा पर्वसे सामाजिक एकता ओ भाइचाराके सम्बन्ध स्थापित करल बटैले बाटी ।
गौरा पर्व मनाइ बुधके रोज धनगढी पुगल मन्त्री राणा गौराके पूजाअर्चनापाछे सञ्चारकर्मीनसे प्रतिक्रिया डेटी ओइसीन बटाइल हुइटी । ‘गौरामे परम्परागत गीत खेलेबर या देउडा खेलेबर एक आपसमे हात जोरके खेलजैना हुइल ओरसे उहीसे सामाजिक एकताहे जोरल आभास कराइठ्,’ उहाँ कहली ।
उहाँ गौरा पर्वहे समृद्धिके पर्वके रूपमे समेत रहल बटैली । हरेक बरस गौरा पर्व मनाइ अपने धनगढीस्थित घरमे अइना करल बटैटी उहाँ कहली, ‘हम्रे धनगढी आपन घरमे हरेक बरस गौराके पूजाअर्चना कैटी आइल बाटी । इहे अवसरमे इ बेर फेन गौरा पूजनके लाग यहाँ आइल बाटुँ ।’
२०७४ सालके निर्वाचनमे उहाँहे पर्यटक उमेदवारके आरोप लागलपाछे उहाँ अब्बेक धनगढीके मेयर गोपाल हमालके घर किनल रही । ओकरपाछे देउवा हरेक बरस गौराके अवसरमे धनगढी अइना करठी ।
शनिच्चरसे अपने गौराके व्रत बैठल बटैटी उहाँ कार्य व्यस्तताके कारण गौरा विसर्जनके लाग धनगढी ढिला पगल बटैली । उहाँ कहली, ‘कार्य व्यस्तताके कारण इ बेर गौरा मनाइ ढिला धनगढी पुग्नु ।’
शनिच्चरके देउवा निवासके गेटमे बम फेला परल रहे । ओहेमारे बुधके उहाँहे कडा सुरक्षाके बीच धनगढी लानल रहे । परराष्ट्रमन्त्री हुइलपाछे पहिलचो धनगढी आइल राणाहे कार्यकर्ताहुक्रे भब्य स्वागत करल रहिट । बुधके सकारे धनगढी विमानस्थलममे कार्यकर्ताहुक्रनके भीड लागल रहे । धनगढी विमानस्थल पुगल नेता कार्यकर्ताहुक्रनहे सम्हर्ना प्रहरीहे कर्रा परल रहे ।
मोटरसाइकल ओ कारमे पुगल कार्यकर्ताहुक्रे नाराबाजी कैटी परराष्ट्रमन्त्री देउवाहे विमानस्थलसे देउवा निवास उत्तरबेहडीसम ¥याली सहित पुगाइल रहिट ।
मन्त्री राणाके स्वागतमे सुदूरपश्चिम प्रदेश सरकारके मुख्यमन्त्री कमलबहादुर शाह, आर्थिक मामिला मन्त्री बहादुरसिंह थापा, सामाजिक विकास मन्त्री मेघराज खड्का, राज्य मन्त्री सरस्वती खड्का लगायतके मन्त्री तथा प्रदेश सभा सदस्यहुक्रनके उपस्थिति रहल रहे ।
ओस्टके उहाँके सुरक्षाके लाग नेपाल प्रहरी, सशस्त्र प्रहरी परिचालन करल रहे । कैलालीके प्रमुख जिल्ला अधिकारी धर्मेन्द्र कुमार मिश्र, एसपी पदमबहादुर विष्ट सहितके सुरक्षाअधिकारी विमानस्थल पुगल रहिट ।