हसुलिया, ३१ सावन । अनुदानमे कृषि उपकरणके लाग रकम उठैना कार्य हुइटी रहल कहटी कैलारी गाउँपालिकासे गम्भीर ध्यानाकर्षण हुइल जनैले बा ।
गाउँपालिका अध्यक्ष राजसमझ चौधरी बिफेक रोज एक सूचनामार्फत अपिल जारी करटी कृषि उपकरण तथा अन्य सामाग्री उपलब्ध करैना कहिके रकम संकलन हुइटी रहल प्राप्त जानकारीप्रति गम्भीर ध्यानाकर्षण हुइल जनैले बटै ।
कैलारी गाउँपालिकाके किसानहे कृषि उपकरण (सिचाई मोटर तथा पावर टेलर) अनुदानमे वितरण कैना कहिके यी पालिकाके किसानसे टमान संघ संस्था तथा व्यक्तिसे रकम संकलन करल सन्र्दभमे उ कार्यमे डेखल समस्या समाधनके लाग टमान निकाय संघ संस्था, राजनितिक दल तथा नागरीक समाजसे प्राप्त सहयोग तथा समन्वयके लाग हार्दिक धन्यवाद आभार व्यक्त कैगिल बा ।

विज्ञप्तीमे कहल बा, अइसिन प्रकृक्तिके कार्यमे डेखल जटिलताके बावजुतफे अभिन कुछ समुह तथा व्यक्तिहुकनसे किसानहे कृषि उपकरण (सिचाई मोटर तथा पावर टेलर) अनुदानमे वितरण कैना कहिके रकम संकलन करल ओरसे किसानहे आब सचेत रना आग्रह कैगिल बा ।
यी सन्र्दभमे कैलारी गाउँपालिकामे कार्यक्रम कार्यान्वयन करे चहना ईच्छुक संघ संस्थाहे नीति विधि अनुरुप गाउँपालिकामे समन्वय कैना अनुरोध कैनाके साथे सक्कु कैलारीबासी किसानमे अइसिन प्रकृतिके कार्यसे सचेत तथा जागरुक रना अनुरोध कैगिल बा । यी मेरिक क्रियाकलापके सम्बन्धमे कौनो जानकारी प्राप्त हुइलेसे वडा कार्यालय तथा गाउँपालिकामे जानकारी करैना सक्कुहुनमे गाउँपालिका अध्यक्ष अपिल करले बटै ।