जोशीपुर । कैलालीके जोशीपुर गाउँपालिका वडा नं. ५ मे रहल थारु भलमन्सा प्रणालीके संस्कृतिके संरक्षण प्रवद्र्धन ओ विकास कैना बनल ऐन २०७८ एक कार्यक्रम बिच हस्तान्तरण करल बा ।
गाउँपालिका अध्यक्ष रामकृष्ण चौधरी, उपाध्यक्ष गिता कठरिया शुकके रोज एक कार्यक्रमके बिच संयुक्त रुपमे उ ऐन हस्तान्तरण करल रहिट । कार्यक्रम वडका पहुना रहल गाउँपालिका अध्यक्ष चौधरी विगतके दिनमे मौखिक रुपमे चल्टी आइल भलमन्सा प्रथाहे लिपिबद्ध तरिकासे ऐन निर्माण करटी रहल ओरसे थारु समुदायके रहनसहन, संस्कृति संरक्षण प्रवद्र्धन ओ विकास कैना टेवा पुग्न बटैलै ।
नेपालके संविधान धारा २२१, धारा २२६, ओ अनुसुची ८ के १२ ओ २२ स्थानीय सरकार सञ्चालन ऐन २०७४ दफा फ (४)(५) दफा ११ (४) को (ठ) र दफा १०२ बमोजिमके अधिकार प्रयोग करके जोशीपुर गाउँपालिकाके छैठौ गाउँसभासे इ ऐन बनाके लागू करल हो । इ ऐन स्थानीय राजपत्र, गाउँ सभासे मिति २०७७ असार २८ मे स्वीकृत हुइल रहे ।
कार्यक्रमके खास पहुना रहल गाउँपालिका उपाध्यक्ष गिता कठरिया पुस्तौसे चल्टी आइल संस्कृतिके संरक्षण प्रवद्र्धन कैनाके साथे अइना दिनमे भलमन्साहुक्रनहे काम कैना सहजता हुइना बटैली ।
बरघर कार्य समितिके अध्यक्ष भलमन्सा प्रतिनिधि सक्ताराम चौधरी गाउँपालिकासे भारी जिम्मेवारी डेहल ओरसे ओकर कार्यान्वयन ओ पालना कैना बटैलै । वडा नं ५ के अध्यक्ष देशराज चौधरीके अध्यक्षतामे हुइल कार्यक्रममे वडा नं ३ वडाध्यक्ष एवम् प्रवक्ता किशोर कुमार कठरिया स्वागत मन्तव्य राखल रहिट ।