१३ आश्विन २०७९, बिहीबार September 29, 2022

आपन अधिकार अछिनकेफे लेहे परठ : राज्यमन्त्री रैका

२४ श्रावण २०७९, मंगलवार
आपन अधिकार अछिनकेफे लेहे परठ : राज्यमन्त्री रैका

धनगढी । सुदूरपश्चिम प्रदेश सामाजिक विकास राज्य मन्त्री टेकबहादुर रैका आपन हक अधिकार अछिनकेफे लेहे पर्ना अवस्था आइल बटैले बटै ।
२८ औं विश्व आदिवासी दिवसके अवसर पारके मंगरके रोज धनगढीमे आयोजित एक कार्यक्रममे बोल्टी राज्यमन्त्री रैका संविधानमे उल्लेख हुइल अनुसार ओइनके हक, अधिकार ओ सुविधा डेना आनाकानी करलेसे अछिनके लेहे पर्ना बटैले बटै ।
उहाँ कहलै, ‘आदिवासी जनजातीके नाउँमे मिठ भाषण करके बहुट जनहनके कमाई खैना भाडा बनल बा । मने आदिवासी जनजातीहुक्रे अधिकारके लरुइयाहे आब चिन्हे पर्ना बा ।’
सक्कु जाति वर्गके उत्थानके लाग बजेट अइना मने कार्यान्वयन नइहुइना राज्यमन्त्री रैका कहलै । दलितके पीडासंगे आदिवासी जनजातीके पीडा रहलफे उहाँ बटैलै ।
कञ्चनपुरके दोधारा चाँदनी नगरपालिकाके नगरप्रमुख किशोर लिम्बुमगर आदिवासी जनजाती एक आपसमे मिले नइसेकल कारण पाछे परटी गैल बटैले बटै ।
आदिवासी जनजाती सोझ जाती रहल मने एक दुसरप्रति इगो रख्ठै,’ उहाँ कहलै, ‘हमारमे अज्ञानता, अशिक्षा बा । मिलके जाई पर्ना अवस्थामे सदा फुट डेखल बा ।’ समाजमे आघे बह्रेक लाग अपने एक छाक खाकेफे लर्कपर्कनहे मजा शिक्षा डेना जरुरी रहल नगरप्रमुख लिम्बुमगर बटैलै ।


कैलारी गाउँपालिकाके उपाध्यक्ष भगवतीकुमारी चौधरी गाउँपालिका थारु भाषाहे कामकाजी बनाइल बटैले बटी । उहाँ सामुदयिक विद्यालयमे कक्षा १ से ३ सम स्थानीय थारु भाषाके पाठयक्रम संचालन करल बटैली । गाउँपालिकासे बडघर भल्मन्साहुकनहे माग नीति तथा कार्यक्रममे धारल उपाध्यक्ष चौधरी बटैली ।
कार्यक्रममे कञ्चनपुर पुनर्वास नगरपालिकाके नगर उपप्रमुख भुलिया राना, जानकी गाउँपालिकाके उपाध्यक्ष लालमति कठरिया, चुरे गाउँपालिकाके उपाध्यक्ष धनादेवी थापामगर, लालझाँडी गाउँपालिकाके उपाध्यक्ष सपना चौधरी राना, थारु कल्याणकारिणी सभाके केन्द्रीय सदस्य प्रभातकुमार चौधरी, नेपाल आदिवासी जनजाती महासंघ सुदूरपश्चिम प्रदेश समन्वय समितिके सल्लाहकार नेत्र तामाङ, अधिवक्त नाथुराम महतो, नेपाल आदिवासी जनजाती पत्रकार महासंघ सुदूरपश्चिम प्रदेश अध्यक्ष रामलखन चौधरी लगायत मन्तव्य व्यक्त करले रहिट ।
कार्यक्रम नेपाल आदिवासी जनजाती महासंघ सुदूरपश्चिम प्रदेश समन्वय समितिके अध्यक्ष दलबहादुर घर्तीमगरके अध्यक्षतामे हुइल रहे । संचालन महासंघके उपाध्यक्ष गंगा योञ्जन ओ स्वागत मन्तव्य उपाध्यक्ष रामकुमारी चौधरी करले रहिट ।
ओस्टेक करके कैलालीके जोशीपुरमे २८ आंै आदिवासी जनजाति दिवस मनाइल बा ।
आदिवासी जनजाति महासंघ जोशीपुरके अध्यक्ष चन्द्रिका चौधरीके अध्यक्षतामे हुइल कार्यक्रममे वडका पहुना जोशीपुर गाउँपालिका अध्यक्ष चित्रबहादुर चौधरी रहल रहिट कलेसे विशिष्ट पहुना नेकपा एमालेके केशर चौधरी रहल रहिट ।
कार्यक्रममे १ नं वडा अध्यक्ष रामचन्द्र चौधरी, पुर्व गाविस अध्यक्ष टिकाराम महतौ, जोशीपुर बजार व्यवस्थापन समितिके अध्यक्ष विश्वनाथ चौधरी, इलाका प्रहरी कार्यालय जोशीपुरके प्रमुख चंख बहादुर कठायत लगायतके उपस्थिति रहल रहे । कार्यक्रममे आदिवासी जनजातिके संस्कृति, भेषभुषा, परम्परा, कला, संरक्षण सम्वद्र्धनके लाग सक्कु जे एक जुट हुई पर्ना कना विषयमे सहभागीहुक्रे जोड डेहल रहिट ।