कैलाली । गौरीगंगा नगरपालिकामे नगहर (सपहेरी) कार्यक्रम हुईल बा ।
हरेक बरस गुरही (नाग पञ्चमी)के दिन हुईना कार्यक्रम सम्पन्न हुईल हो । थारु गुरुवा बैदवा सेवा समितिके नगर अध्यक्ष गोपाल दास चौधरीके अध्यक्षतामे हुईल कार्यक्रममे गौरीगंगा नगरपालिका वडा नम्बर १० के वडा अध्यक्ष नर सिंह सार्की बर्का पहुना रहल रहिट । उहाँ अपने गुरुवा बैदवाहे अईना दिनमे आपनसे हुइना सहयोग कर्ना बटैलै । अपने इहे समाजमे जन्मल ओ इहे समाजमे भिनल ओरसे आन ओरसे सेक्ना सहयोग कैना बटैलै ।

कार्यक्रममे युनिक नेपाल बर्दियाके अध्यक्ष पिरिम थारु अप्ने गुरुवा बैदवाहे एकदम विश्वास कर्ना बटैलै । युनिक नेपाल फेन गुरुवा सम्बन्धी काम करटी रहल ओ पहिचान कैटी सक्कु गुरुवा बैदवाहुक्रनके सम्मेलन करेक पर्ना बटाइल रहिट ।
कार्यक्रममे गायक मनि राम चौधरी, यूनिक नेपालके सचिव निर्माला चौधरी, नगर कार्यपालिका सदस्य लक्ष्मी विक लगायतके सहभागिता रहल रहे । कार्यक्रममे स्वागत हिँगु राम चौधरी कर्ले रहिट ।