धनगढी, १ भादौ । मालपोत कार्यालय कैलाली आपन सेवा भूसेवा (अनलाईन) केन्द्र मार्फत सञ्चालन करले बा ।
कार्यालयसे आपन क्षेत्राधिकार भिट्टर पर्ना घरजग्गाके काम भूसेवा केन्द्रमार्फत सञ्चालन करे लागल हो । मालपोत कार्यालय कैलालीके प्रमुख सुरेन्द्र केसी मंगरसे भूसेवा केन्द्रमार्फत अनलाइन सेवा सञ्चालन करल बटैलै ।
सार्वजनिक पहुँच प्रणालीसे सेवा प्रदान करजैना बटैटी कार्यालय प्रमुख केसी उ प्रणालीमार्फत सेवाग्राही आपन अनुकूल तरिकासे इन्टरनेटके माध्यमसे सहजतापूर्वक घर जग्गा सम्बन्धी कारोबारके लाग अनलाइन फाराम भरे सेक्ना तथा कार्यालयसे अनुमति प्राप्त भूसेवा केन्द्रमे जाके लेखापढी कानून व्यवसायीमार्फत आपन कारोबार अनलाइनमार्फत करे सेकजैना बटैलै ।
शुरूआती चरणमे लिखत पारित अन्तर्गत राजीनामा, अंशबण्डा, बकस पत्र, अंश बुझल भरपाई, छोडपत्र, दर्ताफारी सेवा डेना हुइल बा । रोक्का ओ फुकुवा अन्तर्गत बैंक, वित्तीय संस्था, फाइनान्स तथा सहकारी संस्थासे हुइना धितो रोक्का, व्यक्तिगत दृष्टि बन्धकी रोक्का ओ फुकुवा सम्बन्धी कार्य फेन भूसेवा केन्द्रमार्फत कैना तयारी हुइल कार्यालय जनैले बा ।
मने शुरूआती चरणमे लिखित पारित अन्तर्गतके कारोबार किल करजैना प्रमुख केसी बटैलै । अन्य कार्य क्रमिक रूपमे थप करजैना बटैलै । भूसेवा केन्द्रमार्फत अनलाइन प्रविधिसे सेवा प्रदान हुइलमे कम समयमे प्रभावकारी सेवा प्रवाह हुइना बटाइल बा । भूसेवा केन्द्र सञ्चालनपाछे लेखापढी कानून व्यवसायीके एकाधिकार ओ सेवाग्राही लुटजैना कार्य फेन बन्द हुइना प्रमुख केसीके कहाइ रहल बा ।