धनगढी, १७ सावन । कर्णाली लडियामे लाउ पलटके घाहिल हुइल एक महिलाके मृत्यु हुइल बा । स्थानीय शिक्षक पदमबहादुर भुलका अनुसार मोहन्याल गाउँपालिका–३ के १९ वर्षीया धनसरा सलामी मगरके मृत्यु हुइल हो । ओहकान एक महिनाके छावा कर्ण सलामी मगर समेत घाहिल हुइल बाटै ।
कैलालीके मोहन्याल गाउँपालिका–३ राँगा पलेखा लग्गे दिनके १२ बजेअ‍ोर लडियामे लाउ पलटके थप ३ जाने बेपत्ता हुइल जिल्ला प्रहरी कार्यालय कैलाली जनैले बा ।
बेपत्ता हुउइयामे उहे ठाउँके २० बरसके उर्मिला सलामी मगर, ओहकान १० दिनके शिशु ओ २० बरसके पार्वती थापा रहल बाटै । प्रहरीके अनुसार उहे लाउमे रहल अन्य पाँच जाने घर पौह्रके बाचल बाटै ।
उहाँहुक्रे सुर्खेतके चौकुने गाउँपालिका–४ स्थित स्वास्थ्य चौकीमे बच्चाहे खोप लगाइ ओ उपचार जैटी रहल बेला दुर्घटना हुइल हो । घटनास्थलमे प्रहरी ओ स्थानीय बेपत्ताके खोजी कार्य करटी रहल बाटै । लडियाके बहाव उच्च रहल ओरसे खोजी कार्यमे कठिनाई हुइटी रहल बा ।