धनगढी, ३१ असार । सुदूरपश्चिम प्रदेशके भूमि व्यवस्था कृषि तथा सहकारी मन्त्रालयसे पाँच जाने उत्कृष्ट किसानहे भीमदत्त प्रदेश उत्कृष्ट कृषक पुरस्कार प्रदान करले बा । मंगरके मन्त्रालयमे आयोजना करल समारोहमे टमान जिल्लासे छनोट हुइल पाँच जाने किसानहे पुरस्कृत करल हो ।
कञ्चनपुरके कृष्णपुर नगरपालिका–५ के केरा व्यवसायी किसान अर्जुन जेठारा सर्वोत्कृष्ट कृषक पुरस्कार प्राप्त करले बटै । जेठाराहे प्रदेशके भूमि व्यवस्था कृषि तथा सहकारी मन्त्री बिरबहादुर थापा एक लाख ५० हजार राशिसहित प्रशंसा पत्र, माला तथा दोसल्ला ओह्राके पुरस्कृत कैटी सम्मान करले बटै ।
कैलालीके लम्कीचुहा नगरपालिका–५ के मौरीपालक किसान किरणपाल भारती उत्कृष्ट कृषक पुरस्कार प्राप्त करले बटै । भारतीहे ७५ हजार रुपैयाँ राशिसहित प्रशंसा पत्र, माला तथा दोसल्ला ओह्राके सम्मान करल बा ।
डोटीके आदर्श गाउँपालिकाके मुकुन्द अवस्थी, अछामके पञ्चदेवल विनायक नगरपालिका–६ के कुलबहादुर साउद ओ कञ्चनपुरके भीमदत्त नगरपालिका–१५ के भैँसीपालक किसान सरस्वती पाण्डेहे फेन पुरस्कृत करल बा । उत्कृष्ट कृषकके पुरस्कार प्राप्त करल तिनु जनहनहे जनही २५ हजार, प्रशंसा पत्र ओ दोसल्ला ओह्राके सम्मान करल बा ।
सर्वोत्कृष्ट कृषक पुरस्कार बुुझ्टी केरा व्यवसायी अर्जुन जेठारा जमिन मजा रलेसे नेपालमे कृषि कार्यसे उत्कृष्ट औरे कौनो काम नैरहल बटैलै । देशके टमान ठाउँमे लेहल व्यवसायिक कृषि सम्बन्धी तालिम अपने सफल किसानके रुपमे चिन्हगैल उहाँ बटैलै । जेठारा कैलाली ओ कञ्चनपुरमे करीब ४० बिघा जग्गामे केरा खेती कैटी आइल बटै ।
भीमदत्त प्रदेश उत्कृष्ट कृषक पुरस्कार वितरण समारोहहे सम्बोधन कैटी भूमि व्यवस्था कृषि तथा सहकारी मन्त्री बिरबहादुर थापा एक जाने किसान मजा हुइना विषय सबसे गर्भके बात रहल बटैलै । थापा किसान सफल हुइलेसे आत्मानिर्भर होके देशहे नै आत्मानिर्भर बनाइ सेकजैना हुइल ओरसे उहोर केन्द्रीत होके मन्त्रालयसे काम करटी रहल उल्लेख करले बटै । ओस्टके उहाँ कृषि क्षेत्रमे युवा पुस्ताके बह्रटी रहल आकर्षणसे सकारात्मक सन्देश प्रवाह करल उहाँ बटैलै ।
‘किसान रातदिन नैकहिके कृषि क्षेत्रमे लगानी फेन लगैले बटै । पसिना बगैले बटै । किसान अपहेलित हुइ परल बा । नैपरहल व्यक्ति कृषि पेशा कैना हो । बुढापाखा कैठै कना गलत बुुझाई बा,’ थापा कहलै, ‘मने अब्बे पह्रललिखल युवाहे व्यवसायिक रुपमे कृषिमे अइटी रहल बटै । यी सक्कु जाने सिखे पर्र्ना महत्वपूूर्ण बात हो । मुलुकमे कुछ नैहो कहुइयनके लाग उदाहरणीय काम हुइल बा ।’