धनगढी, २७ असार । धनगढी उपमहानगरपालिकासे संस्थागत विद्यालयहे सम्मान करले बा ।
बिफेक रोज एक औपचारिक कार्यक्रम राखके नगरके ४६ संस्थागत विद्यालयहे सम्मान करल हो । २०८१ के एसईईके नतिजामे सुधार करल कहटी संस्थागत विद्यालयहे सम्मानित करल उप–प्रमुख कन्दकला कुमारी राना बटैली । उप–प्रमुख राना उत्कृष्ट नतिजा लन्ना सफल विद्यालयहे बधाई तथा शुभकामना डेहल रही । “शैक्षिक उपलब्धि महत्त्वपूर्ण विकासके सूचक हो । मेहनत कैके प्रतिस्पर्धाके माध्यमसे उत्कृष्टता हासिल करलमे सक्कु विद्यालयहे शुभकामना बावै,“ उहाँ कहली ।
संस्थागत ओर सात विद्यालयके सत प्रतिशत नतिजा
धनगढीके ४६ संस्थागत विद्यालय २०८१ के एसईईमे सहभागी हुइल रहे । परीक्षामे सात संस्थागत विद्यालयसे सत प्रतिशत विद्यार्थी उत्तीर्ण हुइल बटै । धनगढी–८ क्याम्पस रोडके थ्री स्टार्स इङ्ग्रलिस आवासीय माध्यमिक विद्यालय, धनगढी–८ कान्तिपुर टोलके डिस्कभरी इङ्ग्रलिस आवासीय विद्यालय, धनगढी–४ उत्तरबेहडीके गुरूकूल अङ्ग्रेजी आवासीय माध्यमिक विद्यालय, धनगढी–१३ के किङ्गफिसर इङ्ग्रलिस आवासीय माध्यमिक विद्यालय, धनगढी–५ हसनपुरके वाल्मीकि इङ्ग्रलिस माध्यमिक विद्यालय, धनगढी–३ विशालनगरके सिटी स्कुल ओ धनगढी–७ देवहरियाके साइपाल शिक्षा सदन सतप्रतिशत नतिजा हासिल करले बा ।
धनगढीके संस्थागत विद्यालयसे २०८० के एसईईमे ६८ दशमलव ३७ प्रतिशत विद्यार्थी उत्तीर्ण हुइल रहिट । २०८१ मे नतिजामा थप सुधार कैटी ८७ दशमलव ४६ प्रतिशत विद्यार्थी उत्तीर्ण हुइल उपमहानगरपालिका जनैले बा । २०८१ के एसईईमे धनगढीके चार जाने विद्यार्थी ४ जिपिए ग्रेड हासिल करले बटै । सामुदायिक विद्यालय ओर धनगढी–३ बोराडाँडीके अशोक अवस्थी ४ जिपिए लानल बटै कलेसे संस्थागत ओर एरिष्टो माध्यमिक विद्यालयके गौरव उपाध्याय ओ प्रदिप गिरी तथा धनगढी–२ बैयाँबेहडीके जेसिस एभरेष्ट माध्यमिक विद्यालयके छात्र जस्टिन चन्द ४ जिपिए हासिल करल हुइट ।