३२ असार २०८१, सोमबार July 15, 2024

कैलारी गाउँपालिकाहे पूर्ण खोप सुनिश्चितता घोषणा

१८ असार २०८१, सोमबार
कैलारी गाउँपालिकाहे पूर्ण खोप सुनिश्चितता घोषणा

हसुलिया, १७ असार । कैलारी गाउँपालिका पूर्ण खोप सुनिश्चितता घोषणा कैगिल बा । पालिकाके १ से ९ नम्बर वडामे रहल १६ महिनासे पाँच बरससमके २ हजार ४८१ बालबालिका रहलमे सक्कु बालबालिका खोप लगासेकल ओरसे कैलारी गाउँपालिकाहे पूर्ण खोप सुनिश्चितता घोषणा करल हो ।

कैलारी गाउँपालिकाके वडा नम्बर १ मे उ उमेर समुहके २९५ जाने बालिका रहलमे सक्कु जाने १३ मेरिक खोप लगासेकल कैलारी गाउँपालिका स्वास्थ्य शाखा प्रमुख नरेशकुमार चौधरी बटैलै । वडा नम्बर २ मे ३१४ जाने, वडा नम्बर ३ मे २६२ जाने, वडा नम्बर ४ मे २३६, वडा नम्बर १७०, वडा नम्बर ६ मे ३१३ जाने बालबालिका रहलमे सक्कु जाने १३ मेरके खोप लगाइल उहाँ बटैलै ।

ओस्टेक करके वडा नम्बर ७ मे ३९३ जाने, वडा नम्बर ८ मे २३८ जाने ओ २६० जाने करके पालिका भरिक २ हजार ४८१ बालबालिका रहलमे सक्कु खोप लगाके खोप कार्डफे प्राप्त करल स्वास्थ्य शाखा प्रमुख बटैलै ।

राष्ट्रिय तथ्यांक हेरेबेर १६ प्रतिशत बालबालिका पूर्ण खोप पैले नैहुइट, कलेसे ४ प्रतिशत बालबालिका अक्कोफे खोप नैपाइल उहाँ बटैलै । खोप लगैनामे अब्बेक चुनौतीमे खोप कभरेज कम हुइना, सक्कु तहमे कभरेजमे एकरुपता नइहुइना, ड्रप आउट ढेर हुइना, शुन्य डोज खोपके संख्या बह्रटी जैना रहल स्वास्थ्य प्रमुख बटैलै । नियमित खोप सेवामे खोप छुट हुइना कारण प्रभावकारी परामर्शके अभाव, सेसन नियमित संचालन नइहुइना, संचालन मिति ओ समय निश्चित नैहुइना, चाडपर्वके कारण खोप सेसन नइचल्ना वा बच्चा नइअइना, बच्चा विरामी हु्इलमे, खोप सेसनमे प्रर्याप्त खोप तथा खोप सामाग्री नैहुइना, खोपके पूरा मात्रा लेनाबारे अभिभावकमे जानकारीके कमि, भौगोलिक विकटता वा खोप सेसन पायक नइहुइना रहल उहाँ बटैलै । कैलारी गाउँपालिकाके शिवरत्नपुर ओ मोहनपुर भौगोलिक विकतता रहल उहाँ जनैलै ।

कैलारी गाउँपालिका पूर्ण खोप सुनिश्चितता घोषणा कार्यक्रम गाउँपालिका अध्यक्ष राजसमझ चौधरीके अध्यक्षतामे हुइल रहे । कार्यक्रममे सम्बोधन करटी उहाँ पालिकाहे पूर्ण खोप सुनिश्चितता घोषणा करैनामे महिला स्वास्थ्य स्वय सेविका, स्वास्थ्यकर्मीके भारी योगदान रहल बटैलै । उहाँ कहलै, ‘महिला स्वास्थ्य स्वयं सेविकाह्ुक्रे रातदिन, घाम पानी कुछ नइकहिके सेवा डेटी बटै । गाउँपालिका उहाँहुकनके उच्च मुल्यांकन करले बा । बालबालिकाके स्वास्थ्य सबसे भारी बाट हो । ओइने सक्कु मेरिक खोप पैलेसे रोगसे लरना शक्ति प्रदान हुइठ ।’

पहिले पहिले बालबालिका खोप नइपाके पोलियो लगायत टमान रोगसे पीडित रहिट,’ गाउँपालिका अध्यक्ष कहलै, ‘खोप निशुल्क बा । खोप लगैलेसे रोगसे बाँचे सेक्ना सुनिश्चित बा । सक्कु् बालबालिका खोप लगाई बाल अधिकारफे हो ।’

गाउँपालिका उपाध्यक्ष भगवतीकुमारी चौधरी स्वास्थ्य क्षेत्रमे कैलारी गाउँपालिका आघे रहल ओरसे स्वास्थ्य सँगे शिक्षा क्षेत्रमे ध्यान डेहे पर्ना जरुरी रहल बटैली । उहाँ कहली, ‘खोपके लाग राज्यसे ढेर लगानी लगैले बा । खोपके मुल्यांकन कैलेसे करौडौके लगानी लागठ । अपन बालबालिका खोप पाइल नइपाइल अभिभावकफे जागरुक हुईपर्ना ओ खोप केन्द्रमे तोकल समयमे खोप लगाई पर्ना जरुरी डेखजाइठ ।’ शिक्षा क्षेत्रके गुणस्तर घटटी गैल ओरसे ओहोरफे ध्यान डेहे पर्ना जरुरी रहल गाउँपालिका उपाध्यक्ष बटैली ।

कार्यक्रममे कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी खोपके क्षेत्रमे कैलारी गाउँपालिका आघे रहल बटैलै । उहाँ कहलै, ‘कोई बालबालिका खोपसे बञ्चित नहुइट कना हो । कोई छुटल कलेसे खोज ओ खोपा अभियान चलैना बा ।’
जिल्ला स्वास्थ्य कार्यालय कैलालीके प्रतितिधि ओलट नारायण चापागाई २०६९ सालसे पूर्ण खोप सुनिश्चितता पालिका ओ प्रदेश घोषणाके अभियान चलाइल बटैलै । उहाँ घोषणा केल नाही यिहीहे निरन्तरण डेहे पर्ना बटैलै ।
राप्रापा नेपाल कैलारी गाउँपालिका अध्यक्ष नेपालु चौधरी पूर्ण खोप सुनिश्चितताके लाग महिला स्वास्थ्य स्वयं सेविकाहुकनके अतुलनिया योगदान करल कहटी उहाँहुकनके सेवा सुविधा बह्राई पर्ना आग्रह करलै ।

पूर्ण खोप सुनिश्चिता घोषणा करैनामे योगदान रहल कहटी १ से ९ नम्बरके वडा अध्यक्ष ओ स्वास्थ्य संस्थाहे दोसल्लासहित सम्मान कैगिल बा । उहे अवसरमे १६ जाने खोप कार्यकर्ताहुकनफे सम्मान कैगिल बा । सम्मानित हुइलमे महेन्द्र राज कठरिया (सि.अ.हे.व.) रामदुलारी चौधरी (सि.अ.न.मी.) बालीचरण कठरिया (सि.अ.हे.व.), उर्मिला जोशी (सि.अ.न.मी.), मेनुका चौधरी (सि.अ.हे.व.), भागरथी पनेरु (सि.अ.न.मी.), भोजराज नेगी (सि.अ.हे.व.), लक्ष्मीदेवी रोकाया (सि.अ.न.मी.), नत्थु चौधरी (सि.अ.हे.व.), रिता चौधरी (अ.न.मी.) रहल बटै ।

ओस्टेक करके फलीराम चौधरी (सि.अ.हे.व.), रेखाकुमारी चौधरी (अ.न.मी.), संजिव गुरुङ (सि.अ.हे.व.), रितु खरेल (सि.अ.न.मी.), संजयकुमार महतौं (सि.अ.हे.व.), सुनिता चौधरी (सि.अ.न.मी.), बिरबहादुर चौधरी (सि.अ.हे.व.) ओ सरिता चौधरी (सि.अ.न.मी.) रहल बटै । ओस्टेक करके नवजीवन सेवा संघहेफे सम्मान कैगिल बा । कार्यक्रममे स्वागत मन्तव्य कैलारी गाउँपालिका सामाजिक विकास शाखा प्रमुख यगम कलेल करल रहिट ।

पूर्ण खोप सुनिश्चित घोषणा कार्यक्रममे सक्कु वडाके वडा अध्यक्ष, कार्यपालिका सदस्य, गाउँपालिकाके प्रमुख प्रशासकीय अधिकृत खगेन्द्रराज जोशी, टमान शाखाके प्रमुख, कैलारी गाउँपालिका अन्र्तगत १ से ९ वडामे रहल स्वास्थ्य संघके प्रमुख, स्वास्थ्यकर्मी, महिला स्वास्थ्य सेविका, टमान संघसंघके प्रतिनिधिहुकनके सहभागिता रहे । ओस्टेक करके १ से ९ वडामे रहल स्वास्थ्य संस्थाके सामाजिक लेखा परिक्षणबारे जानकारी तपेन्द्र भुषाल डेहल रहिट ।