९ जेष्ठ २०८१, बुधबार May 22, 2024

३ महिनासे विपतपुरके स्थानीय टेन्ट टरे बैठ्ना बाध्य

१० श्रावण २०७९, मंगलवार
३ महिनासे विपतपुरके स्थानीय टेन्ट टरे बैठ्ना बाध्य

धनगढी । कैलाली जिल्लाके कैलारी गाउँपालिका वडा नम्बर ७ विपतपुरस्थित मुक्त कमैया वस्तीमे आगी लागल आज ३ महिना पुगे लागल । यिहे बैशाख ११ गते बिपतपुरमे भिषण आगलागी होके ७१ घर मन्से ३५ घर पूर्ण क्षति होके अवशेष किल बचल रहे कलेसे ३६ घर आंशिक रूपमे क्षति हुइल रहे । मने, यहाँक मुक्त कमैया टेन्ट टरे रात कटैना बाध्य बटैं ।
परिवर्तनका लागि कार्यरत युवा समूह (याक) नेपालके राइट टु फूड प्रोजेक्टके पहलमे सोम्मारके रोज बिपतपुर मुक्त कमैयाके सवालबारे डेलिगेशनमे जिल्ला प्रशासन कार्यालय पुगल गाउँक भल्मन्सा हिंगुराम चौधरी मुक्त कमैया वस्तीमे आगी लागल पूरा ३ महिनासे अप्नेहुक्रे टेन्टमे बैठल बटैलैं । उहाँ कलैं, “आगी लागलपाछे रेडक्रम लगायत संस्थासे डेहल टेन्टमे बैठल बटि ।” “सित–घाम लाग्के संस्थासे डेहल टेन्ट फेन सरे लागल बा,” उहाँ कलैं, “गुजारा करेक लाग बनुवा मन्से भट्ठा नन्के झोप्री फेन बनैले बटि, मने ओहे घुनाके टुटे लागल ।” उहाँ सरकारसे घर बनाडेब कना आवश्वसन आइल मने अभिन पूरा नैहुइल गुनासो करलैं ।


ओस्टेके, गाउँक जानकीदेवी चौधरी आगलागी हुइल बादके समय बहुट कठिन हुइल बटैलि । उहाँ कलि, “घुनाइल झोप्रीमेसे उप्परसे जम्मा डुर झरठ ।” “अइसिन बर्खाके समयमे पानी नाआए कना सोच्ठी,” उहाँ कलि, “पानी अइलग्टीकिल सक्कु टेन्ट ओ झोप्री मन्से पानी चुए लागठ ।” उहाँ सरकार हलिसे हलि घर बनाडेलेसे वस्तीके मजा हुइना बटैलि ।
आगलागी विपत व्यवस्थापन संघर्ष समितिके संयोजक दाउराम चौधरी वस्तीहे कुछ संस्थासे डेहल आर्थिक सहयोग फेन बर्खा लगाइबेर ओराइल ओरसे घर बनैनामे और समस्या आइल बटैलैं । उहाँ कलैं, “वस्तीके सहयोगमे टमान संस्था अन्नपानीके लाग आर्थिक तथा जिन्सी सहयोग करले रहे ।” “पाइल आर्थिक सहयोग खेतीपाटीमे लगैलि,” उहाँ कलैं, “यी बर्खामे टे और डिजल महंगा होके हम्रे समस्यामे परलि । मलके अभिन पटा नैहो ।”


यहोर प्रमुख जिल्ला अधिकारी किरण थापा जिल्ला प्रशासन कार्यालयसे बिपतपुर वस्तीमे घर बनाइक लाग डिभिजन वन कार्यालय कैलालीहे सिफारिस करसेकल बटैलैं । “बिपतपुर वस्तीके लाग हम्रे यहाँसे सिफारिस करसेक्ले बटि,” उहाँ कलैं, “आब विपतपुर वस्तीके घर बनाइक लाग कहाँ कैसिक कठुवाके व्यवस्था करना हो, उ डिभिजन वन कार्यालय करि ।” उहाँ बिपतपुर वस्तीके घर बनाइक लाग सुदूरपश्चिम सरकारके भूमि व्यवस्था, कृषि तथा सहकारी मन्त्रालय आर्थिक व्यवस्था करल जानकारी करैलैं ।
भूमि व्यवस्था, कृषि तथा सहकारी मन्त्री बिनितादेवी चौधरीके स्वकीय सचिव दीर्घ बिनाडीके अनुसार बिपतपुर वस्तीमे घर बनाइक लाग मन्त्रालयसे बजेट छुट्यासेकल बटैलैं । “बिपतपुर वस्तीमे घर बनाइक लाग बजेट छुटइल बा,” उहाँ कलैं, “उ वस्तीमे घर बनैना कार्यविधि तयार हुइटा । कार्यविधि तयार हुइटिकिल वस्तीमे घर बन्ना सुरु हुइ ।” उहाँक अनुसार बिपतपुरमे मन्त्रालयके बजेट ओ ह्याटेट फर ह्युमानिटी नेपालके प्राविधिक सहयोगमे घर बनि ।
ओस्टेके, डिभिजन वन कार्यालयके वन व्यवस्थापन शाखाके अधिकृत राधिका बोहरा बिपतपुरमे घर बनाइक लाग ढेर कठुवा आवश्यक रहल ओरसे यी आर्थिक वर्षके उपलब्ध नैहुइल बटैलैं । उहाँ कठुवा विक्री वितरणके लाग आर्थिक वर्ष २०७९/८० के नयाँ कार्यविधि बन्टिरहल बटैलि । उहाँ कलि, “नयाँ कार्यविधि स्वीकृति हुइटिकिल कठुवा विक्री वितरण सुरु हुइ ।” उहाँ नयाँ कार्यविधि बन्ना भदौसम लग्ना बटैलि ।
उहाँहुकनके विपद् जोखिम न्यूनीकरण ओ व्यवस्थापन ऐन, २०७४ अन्तर्गतके विपद् पीडित उद्धार ओ राहतसम्बन्धी (सातौं संशोधन) मापदण्ड, २०७७ अनुसार घर निर्माणके लाग आर्थिक सहयोग उपलब्ध कराइ परना ओ विपद्से क्षति हुइल घर पुनर्निर्माणके लाग जिल्ला वन कार्यालयसे निःशुल्क रूपमे काठ उपलब्ध कराइ परना माग रहल बा ।
डेलिगेशनमे कैलारी गाउँपालिका वडा नम्बर ७ के निवर्तमान वडाध्यक्ष कमलप्रसाद चौधरी, याक नेपालके देवीप्रसाद खनाल, प्रदीपकुमार चौधरी, गाउँसे विसराम चौधरी, अनिता चौधरीलगायतके टोली जिल्ला प्रशासन कार्यालय पुगल रहैं ।