९ श्रावण २०८१, बुधबार July 24, 2024

गेटा मेडिकल कलेज र वीर अस्पतालबीच दुई पक्षीय सम्झौता

९ श्रावण २०७९, सोमबार
गेटा मेडिकल कलेज र वीर अस्पतालबीच दुई पक्षीय सम्झौता

धनगढी । कैलालीको गेटा मेडिकल कलेज र वीर अस्पतालबीच दुई पक्षीय सम्झौता भएको छ । गेटा मेडिकल कलेज, अस्पताल कैलाली र कोभिड–१९ यूनिफाइड केन्द्रीय अस्पताल (वीर अस्पताल)बीच द्विपक्षीय सम्झौता भएको हो । चिकित्सकीय सेवालाई विस्तार गरी प्रविधियुक्त स्वास्थ्य सेवा प्रवाहका लागि दुवै संस्थाबीच सम्झौता भएको जनाइएको छ ।
गेटा मेडिकल कलेज, अस्पतालका निर्देशक सहायक प्रा.डा. प्रमोद जोशी र कोभिड युनिफाइड केन्द्रीय अस्पताल, वीर अस्पतालका प्रमुख प्रशासकीय अधिकारी प्रा.डा.भूपेन्द्रकुमार बस्नेतले द्विपक्षीय सम्झौतापत्रमा हस्ताक्षर गरेका हुन् । सम्झौतानुसार दुवै संस्थाले विशेषज्ञ जनशक्ति आदानप्रदान गर्ने छन् । यसैगरी, विशेषज्ञ चिकित्सकीय सेवा प्रवाहको लागि आवश्यक प्राविधिक सहयोग पनि आदानप्रदान गर्ने सम्झौता गरिएको छ ।


यस्तै, अन्य विषयमा आपसी छलफल तथा समझदारीमा उपचारात्मक सेवाहरुको आदानप्रदान गरिने सम्झौतापत्रमा उल्लेख छ । अस्पतालका निर्देशक सहायक प्रा.डा. प्रमोद जोशीका अनुसार मेडिकल कलेजका भवन निर्माणको कार्य ९० प्रतिशत कार्य पूरा भए पनि बिजुली, खानेपानी र ढलको व्यवस्था नभएका कारण समस्या भएको छ । गेटामा मेडिकल कलेज र अस्पताल सञ्चालनको प्रक्रियाले गति लिएको उनले बताएका छन् ।
कैलालीको गेटामा भौतिक संरचना तयार भए पनि गेटा मेडिकल कलेज, अस्पताल अहिलेसम्म सञ्चालन भने हुन सकेको छैन । सरकारले अझै पनि यसको मोडालिटी नै बनाउन सकेको छैन । मोडालिटी तय नहुँदा मेडिकल कलेज, अस्पताल सञ्चालनको कुनै टुङ्गो लागेको छैन । अहिलेसम्म भौतिक संरचनामात्रै पाँच अर्ब रुपियाँ खर्च भएको छ ।