८ बैशाख २०८१, शनिबार April 20, 2024

गुर्हिक दिन नगहर खेल हुइना

३० असार २०७९, बिहीबार
गुर्हिक दिन नगहर खेल हुइना


सागर कुस्मी
धनगढी ।
कैलालीके गाैरीगंगा नगरपालिका वडा नम्बर १० सुन्दरपुर गाउँमे नगहर खेल हुइक लाग बा ।

गाउँमे रहल थारु देउथान उदासीपुरमे यी बरस फेन नगहर खेल हुइना आयोजक जनैले बा । हरेक बरस गुर्हिक दिन (नाग पञ्चमी) इ गाउँमे नगहर खेल हुइठ । इहे खेलसे साँपनके काटल बिष झर्ना, लावा लावा गुरुवा निकर्ना नगहर खेलमे कैना प्रचारप्रसार संयोजक दिनेश दहित थारु जानकारी डेलैं ।

थारु समुदायमे पुरान पुरान गुरुवा लोप हुइटी जैना हुइल ओर्से अइना दिनमे थारु समुदायमे गुरुवा फेन समाजमे ढेर जिम्माबार हुइल ओर्से इ नगहर खेल कर्टी आइल उहाँ बटैलैं । उहाँ कलैं, “लावा गुरुवा उत्पादन करक लाग इ बरसफेन धुमधाम तरिकासे नगरहर कार्यक्रमके आयोजना करल उहाँके कहाइ बटिन ।

थारु गुरुवा बैदवा सेवा समिति समाज गौरीगंगा १० कैलालीके आयाेजनामे इहे सावन १७ गते थारु देउथान उदासीपुरमे नगहर खेल हुइ जाइटा । अपन ठाउँक सक्कु गुरुवनसे आर्थिक सहयाेग उठाके कार्यक्रम करटि रहल थारु गुरुवा बैदवा सेवा समाजके अध्यक्ष गाेपाल दास चाैधरी बटैलैं । समाजमे आवद्व रहल गरुवनसे २०० रुपिया ओ लावा गुरुवा निक्रलेसे पुजाके लाग ४०० रुपिया लेना अध्यक्ष चाैधरी बटैलैं । यम्ने फेन काेइ गुरुवा बैदवा समाजसे चलाइल अभियानमे भाषा, कला, संस्कृति हमार पहिचान, थारु वैदिक गुरुवा प्रशिक्षण केन्द्र संगे थारु संग्रहालय बनैना हमार अभियान मुख्य उद्देश्य बा । काेइ इच्छुक सहयोगी फेन सहयाेग करे सेक्जैना अध्यक्ष चाैधरी बटैलैं ।