हसुलिया । कैलालीके कैलारी गाउँपालिका अपन पालिकाभिटर रहल दलित, मुक्तकमैया, विपन्न वर्गहे सम्बन्धित वडाके सिफारिसमे निःशुल्क विद्युत वितरण कैना जनैले बा । गाउँपालिका अध्यक्ष राजसमझ चौधरीके पहलमे यिहे असार २४ गतेभिटर सम्बन्धित वडा कार्यालयके सिफारिसमे विद्युत मिटर वितरण कैना गाउँपालिका अध्यक्षके स्वकीय सचिव जितेन्द्र चौधरी बटैलै ।
आर्थिक अभावमे अभिनसम विद्युत मिटर पैना बन्चित रहल गाउँपालिकाभिटरके गरिब, दलित, मुक्तकमैया, विपन्न वर्गहुकन निःशुल्क विद्युत मिटर वितरण कैना बा । विद्युत मिटर नइरहल परिवार उ सेवा लेहक लाग सम्बन्धित वडा कार्यालयके सिफारिस लेके विद्युत मिटर पाई सेक्ना पालिका जनैले बा ।
इहे बिच नेपाली राजनीतिके शिखरपुरूष, शान्ति प्रक्रियाके महानायक, नेपाली काँग्रेसके पुर्व सभापति एवम् पूर्व प्रधानमन्त्री नेता स्वर्गीय गिरिजा प्रसाद कोइरालाके ९९ औं जन्मजयन्तीके अवसरमे कैलारी गाउँपालिका–७ मे शनिच्चरके रोज टमान जातके टेलुवा लगाइल बा । गाउँपालिका अध्यक्ष राजसमझ चौधरीके वडका पहुनामे वृक्षारोपण कैगिल बा ।
वडा कार्यालयके प्राङगण आसपास करिब टमान जातके (मसला,कपूर,सगुन, बकाइनो, लिप्टीस) एक सय टेलुवा लगाइल गाउँपालिकाके प्रवक्ता तथा वडा नम्बर ७ के अध्यक्ष दिपेन्द्रबहादुर बम जानकारी डेलै ।
वृक्षारोपण कार्यक्रममे विशिष्ट अतिथिमे कैलारी गाउँपालिकाके सभापति कृष्णप्रसाद चौधरी, अतिथिमे पार्टीके क्षेत्रीय सचिव रमेश चौधरी, नेपाली काँग्रेसके कैलालीके पूर्व सचिव रामचरण चौधरी, जनप्रतिनिधि, स्थानीयहुक्रनके सहभागिता रहल रहे ।