३२ असार २०८१, सोमबार July 15, 2024

कैलारी गाउँपालिका–३ ओ ९ के सार्वजनिक सुनुवाई कार्यक्रम सम्पन्न

१६ असार २०८१, शनिबार
कैलारी गाउँपालिका–३ ओ ९ के सार्वजनिक सुनुवाई कार्यक्रम सम्पन्न

हसुलिया, १५ असार । कैलारी गाउँपालिका वडा नम्बर ३ ओ वडा नम्बर ९ के चालु आर्थिक बर्षके सार्वजनिक सुनुवाई कार्यक्रम शुकके रोज सम्पन्न हुइल बा ।
स्थानीय सरकार ओ नागरिकहुकनके बीचमे दोहोरो सम्वाद स्थापित कैना, सम्वादसे जनताहे स्थानीय विकासके प्रक्रियामे रचनात्मक प्रतिनिधित्व कराके पारदर्शिताके माध्यमसे स्थानीय विकास निर्माण कार्य ओ सेवा प्रवाहहे गुणस्तरीय, प्रभावकारी बनाइक लाग वडा नम्बर ३ ओ वडा नम्बर ९ के चालु आर्थिक बर्ष २०८०/०८१ के सुनुवाई कार्यक्रमम हुइल हो ।
वडा नम्बर ३ के वडा अध्यक्ष सन्तराम चौधरीके अध्यक्षतामे हुइल कार्यक्रममे उहाँ वडामे रहल सीमिति बजेटहे जनताके माग अनुसार प्रथामिकीकरण करटी आघे बह्रल बटैलै ।
वडा कार्यालयमे आइल ढेर बजेटके आधारमे विकास योजना आघे बह्रजाइठ, उहाँ कहलै, ‘सीमिति बजेटहे क्रमागत रुपमे काम कैना बाध्यता बा । ढेर बजेट रहलेसे जनताके ढेर माग पुरा करे सेक्जाइठ । जटरा बजेट रहठ उहीहे समन्वय करके आघे बह्रठी ।


कार्यक्रममे वडा सचिव दयाराम चौधरी वडा कार्यालयसे चालु आर्थिक बर्षमे कैगिल प्रगती, विकासके काम, बजेट, राजश्व संकलनलगायतके गतिविधि प्रस्तुतीकरण करल रहिट । सार्वजनिक सुनुवाई कार्यक्रममे भल्मन्सा तथा नेकपा माओवादी केन्द्र कैलारी–३ के अध्यक्ष छोटेलाल चौधरी, नेपाली काँग्रेस निबर्तमान महाधिवेशन प्रतिनिधि भरतराम चौधरी, सिएफसिसिके अध्यक्ष रमेश चौधरी, खेलाडीहुकनके ओरसे भिख्खु चौधरीलगायत अपन बाट राखल रहिट । कार्यक्रममे वडा सदस्य किसुनलाल चौधरी स्वागत मन्तव्य राखल रहिट । कार्यक्रममे वडा सैतुराम चौधरी, पार्वती विकलगायत टमान गाउँक भल्मन्सा, राजनितिक दलके प्रतिनिधि, महिला स्वास्थ्य स्वमं सेविका, यूवा, सहकारी संस्था, सामुदायिक वनके प्रतिनिधिहुकनके सहभागिता रहे ।

ओस्टेक करके वडा नम्बर ९ मे वडा खेमराज चौधरीके अध्यक्षतामे हुइल कार्यक्रममे उहाँ सहकार्य समन्वय करटी आघे बह्रल बटैलै । उहाँ कहलै, वडामे आइल बजेट आवश्यकताके आधारमे योजना बनाके आघे बह्रल बा । योजना बनाई भल्मन्साहुकनसे समन्वय करके आघे बह्रल बटी ।’
कार्यक्रममे वडा सचिव ठागुराम चौधरी वडा कार्यालयसे चालु आर्थिक बर्षके गतिविधि ओ बजेट सार्वजनिक करल रहिट । कार्यक्रममे वडा सदस्य धनबहादुर राना योजना बनाईबेर सक्कु जनहनहे समन्वय करके जाई पर्ना, नेपाली काँग्रेसके गरिबदास चौधरी योजनाके इस्टिमेट बनाके लागु करे पर्ना, टमान सामुदायिक बनके प्रतिनिधि, स्थानीय, महिलाहुक्रेफे अपन बाट राखल रहिट ।
कार्यक्रममे कार्यपालिका सदस्य जगमा चौधरी, वडा सदस्य कृष्णीदेवी परियारलगायत, टमान राजनीतिक दलके प्रतिनिधि, भल्मन्सा, महिला स्वास्थ्य स्वयं सेविका, जेष्ठ तथा अपाङता रहल व्यक्ती, एकल महिला, सामुदायिक वनके पदाधिकारी, सहकारी संस्थाके प्रतिनिधिहुकनके सहभागिता रहे । सार्वजनिक सुनुवाई कार्यक्रम कैलारी गाउँपालिकाके सम्बन्धित वडा कार्यालयके आयोजना तथा पहुरा मिडिया प्रालिके सहजीकरणमे हुइल हो ।