३२ असार २०८१, सोमबार July 15, 2024

कैलारी गाउँपालिका–२ ओ ५ के सार्वजनिक सुनुवाई कार्यक्रम उसरल

१० असार २०८१, आईतवार
कैलारी गाउँपालिका–२ ओ ५ के सार्वजनिक सुनुवाई कार्यक्रम उसरल

हसुलिया, ९ असार । कैलारी गाउँपालिका वडा नम्बर २ ओ वडा नम्बर ५ के चालु आर्थिक बर्षके सार्वजनिक सुनुवाई कार्यक्रम अँटवारके रोज उसरल बा । चालु आर्थिक बर्ष २०८०/०८१ सालमे हुइल कैगिल सार्वजनिकीकरणके लाग वडा नम्बर २ ओ वडा नम्बर ५ के सार्वजनिक सुनुवाई कार्यक्रमम हुइल हो ।
वडा नम्बर २ के वडा अध्यक्ष विकास चौधरीके अध्यक्षतामे हुइल कार्यक्रममे उहाँ वडामे रहल सीमिति बजेटहे जनताके माग अनुसार प्रथामिकीकरण करटी आघे बह्रल बटैलै ।
वडा कार्यालयमे ढेर बजेट नइरहठ,’ उहाँ कहलै, सीमिति बजेटहे क्रमागत रुपमे काम कैना बाध्यता बा । ढेर बजेट रहलेसे जनताके ढेर माग पुरा करे सेक्जाइठ । जटरा बजेट रहठ उहीहे समन्वय करके आघे बह्रठी ।’
कार्यक्रममे वडा सचिव हिरा ठकुल्ला वडा कार्यालयसे चालु आर्थिक बर्षमे कैगिल प्रगती, विकासके काम, बजेट, राजश्व संकलनलगायतके गतिविधि प्रस्तुतीकरण करल रहिट । सार्वजनिक सुनुवाई कार्यक्रममे स्थानीय, भल्मन्सा यूवा क्लव, विद्यालय व्यवस्थापन समितिके अध्यक्ष, टमान राजनितिक दल, महिला स्वास्थ्य स्वयं सेविका आ अपन बाट राखल रहिट । टमान ठाउँमे होमपाइपाके आवश्यकता, कल्र्भट, देउथान, मन्दिर निर्माण व्यवस्थापन, डगरघाटहे ध्यान देना आग्रह करल रहिट । कार्यक्रममे कार्यपालिका सदस्य टिका चौधरी भुल, सन्तराम चौधरी, राजकलादेवी खनाललगायतके सहभागिता रहे । कार्यक्रममे स्वागत मन्तव्य वडा सदस्य आशिक चौधरी करल रहिट ।


ओस्टेक करके वडा नम्बर ५ मे वडा अध्यक्ष विष्णु प्रसाद चौधरीके अध्यक्षतामे हुइल कार्यक्रममे सहकार्य समन्वय करटी आघे बह्रल बटैलै । उहाँ कहलै, ‘वडामे आइल बजेट वडाके सक्कु टिम विच छलफल हुइठ । आवश्यक परल बेला स्थानीय राजनीतिक दल, भल्मन्सालगायतसे समन्वय करके आघे बह्रल बटी ।’
कार्यक्रममे वडा सचिव सोनुराम चौधरी वडा कार्यालयसे चालु आर्थिक बर्षके गतिविधि ओ बजेट सार्वजनिक करल रहिट । कार्यक्रममे भल्मन्सा राम बहादुर चौधरी, प्रकास बौखाही, सुनहरा ताल आधारभूत विद्यालय व्यवस्थापन समितिके अध्यक्ष जन्तीराम चौधरी, जनकल्याण माविके प्रअ जगन्नाथ चौधरीलगायत अपन बाट राखल रहिट ।
कार्यक्रममे थारु महिला संजालके कोषाध्यक्ष कृष्णा चौधरी, पवेरा खानेपानी तथा उपभोक्ता समितिके अध्यक्ष अशोक चौधरीलगायगत अपन मन्तव्य व्यक्त करल रहिट । कार्यक्रममे वडा सदस्य भागुदास चौधरी, मानबहादुर चौधरी, अनारकली चौधरी, पवित्रा परियारलगायत, टमान राजनीतिक दलके प्रतिनिधि, भल्मन्सा, महिला स्वास्थ्य स्वयं सेविका, जेष्ठ तथा अपाङता रहल व्यक्ती, एकल महिला, सामुदायिक वनके पदाधिकारीके सहभागिता रहे । सार्वजनिक सुनुवाई कार्यक्रम कैलारी गाउँपालिका वडा कार्यालयके आयोजना तथा पहुरा मिडिया प्रालिके सहजीकरणमे हुइल हो ।