धनगढी । खाद्य सुरक्षा सम्बन्धी १ दिने अभिमुखीकरण कार्यक्रम बुधके रोज धनगढीमे हुइल बा ।

नेपाली उपभोक्ता संरक्षण महासंघ सुदुरपश्चिम प्रदेशके आयोजना ओ उद्योग, पर्यटन वन तथा वातावरण मन्त्रालय सुदुरपस्चिमके आर्थिक सहयोगमे उ अभिमुखीकरण कार्यक्रम हुइल रहे ।

कार्यक्रममे महासंघके अध्यक्ष रामचन्द्र जोशी खाद्य वस्तु सम्बन्धी जानकारी डेले रहिंट । उहाँ दैनिक जीवनमे प्रयोग हुइना खाद्य वस्तु गुणस्तर हुइ पर्ना बटैलैं । बजारमे ढेर जैसिन भारतसे अइना खाद्य वस्तुहे रोकके, नेपालमे उत्पादन हुइल वस्तुहे दैनिक रुपमे प्रयोग कैना बात बट्वइलैं । अस्टेके बजारमे मिल्ना गुणस्तरहिन खाद्य वस्तुहे रोकक् लाग नेपाली उपभोक्ता संरक्षण महासंघ भारी भुमिका खेल्ना अध्यक्ष जोशी बटैलैं ।

अस्टेक नन्हें कार्यक्रममे खाद्य प्रविधि तथा गुण नियन्त्रण कार्यालय धनगढीके अधिकृत नवराज ढकाल खाद्य स्वच्छता ओ खाद्यवस्तुके गुणस्तर विषयमे जानकारी करैले रहिंट । उहाँ कौनो फेन खाद्यवस्तु किने बेर खाद्यवस्तुके उपभोग कर्ना ओ उत्पादन करल म्याद हेरके किल किने पर्ना सुझाब डेलैं ।

इहे कार्यक्रममेमे याक नेपालके अध्यक्ष देवी खनाल खाद्य सुरक्षा ओ खाद्य सम्प्रभुता सम्बन्धी जानकारी डेले रहिंट । उहाँ खाद्य सुरक्षा, खाद्यके उपलब्धता, खाद्यमे पहुँच, खाद्य उपभोग, खाद्य दिगोपनाके बारेमे बात बट्वइले रहिंट ।

ओस्टेके कार्यक्रममे पोषण तथा खाद्य सुरक्षाके बारेमे स्वास्थ्य निर्देशनालयके अधिकृत केसर बहादुर साउँद जानकारी करैलैं । उहाँ एक दिनमे एक मनैयाँहे कत्रा मात्रामे खाद्य वस्तु आवश्यक परठ कना बातके जानकारी करैले रहिंट ।

कार्यक्रममे खाद्य सुरक्षाके सम्बन्धमे नेपालमे प्रचलित ऐन कानुन तथा सरोकारवाला संघसंस्था के बारेमे कृषि ज्ञान केन्द्र कृषि प्रसार अधिकृत जनक बोहरा जानकारी डेले रहिंट । इ कार्यक्रममे महासंघके कोषाध्यक्ष झुमा चौधरी, जयराज भट्ट, पंकच जोशी, लगायत स्थानीय, बुद्धिजीवी, व्यापारी, कर्मचारी, विद्यार्थी लगायत एक सयसे ढेर जहनके सहभागी हुइल रहे । कार्यक्रम सहजीकरण महासंघके सचिव बल बहादुर साउँद करले रहिंट ।