२१ मंसिर २०७९, बुधबार December 7, 2022

विदेशसे लानल पैसा सही सदुपयोग कैना आग्रह

११ असार २०७९, शनिबार
विदेशसे लानल पैसा सही सदुपयोग कैना आग्रह

धनगढी । धनगढी उपमहानगरपालिकाके नगर प्रमुख गोपाल हमाल विदेशसे कामके लानल पैसाके सही सदुपयोग कैना आग्रह करले बटै ।
शनिच्चरके रोज ट्रेस प्रालिसे संचालित सुरक्षित आप्रवासन परियोजना (सामी) अन्र्तगत सुरक्षित बैदेशिक रोजगार सम्बन्धी स्थानीय तहके पत्रकारहुकनसंग हुइल अन्तरक्रिया कार्यक्रममे नगर प्रमुख गोपाल विदेशसे कामके नानल पैसाके सही सदुपयोग कैना आग्रह रहिट ।
उहाँ कहलै–‘विदेश आइल रेमिटेन्ससे देशके अर्थतन्त्र धानटा । वैदेशिक रोजगारी जाके टमान व्यक्ति मजा प्रगति करल मने कतिपयके घरवारसमे विग्रल ओरसे वहाँसे आइल पैसाके सदुपयोग करके उद्यमशिलतामे लगानी कैना जरुरी बा ।’
वैदेशिक रोजगार सबसे भारी उद्योग हो,’ नगर प्रमुख हमाल कहलै, ‘वहाँसे सबमेरिक काम मिलठ । विदेशमे सिखल सीप ओ पैसाके सदुपयोग करलेसे स्वदेशमे ढेर अवसर मिले सेकठ ।’
कोरियाके उदाहरण डेटी उहाँ कहलै पहिले पहिले कोरियाके नागरिक औरे देशमे जाके रोजगारी करिट कलेसे अब्बे और देशके नागरिक कोरियामे रोजगारी करटै । उपमहानगरपालिकाफे यूवा लक्षित कार्यक्रम नानके यिहे टमान व्यवसाय करेसेक्ना नीति तथा कार्यक्रम नन्टी रहल नगरप्रमुख हमाल बटैलै ।


कार्यक्रममे सुरक्षित आप्रवासन (सामी) परियोजनाके वैदेशिक रोजगार बोर्ड कार्यक्रम अधिकृत लक्ष्मी चौधरी यी परियोजना कैलालीके चार स्थानीय पालिकामे काम करटी रहल बटैली । सामी परियोजना धनगढी उपमहानगरपालिका, घोडाघोडी नगरपालिका, टीकापुर नगरपालिका ओ जानकी गाउँपालिकामे कार्य करटी रहल उहाँ जनैली । परियोजना वैदेशिक रोजगारमे जउइयाके लाग सूचनाके पहुँच, सीप तालिमके लाग सहजीकरण, न्यायमे सहजीकरण, मनोसामाजिक परामर्शके सिफारिस वित्तीय साक्षरता सम्बन्धी जानकारी डेटी उहाँ बटैली ।
ओस्टेक परियोजनाके गतिविधिबारे जानकारी उहाँ २०७८ असारसे २०७९ असार ९ गतेसम आप्रावासी स्रोत केन्द्र÷उपकेन्द्रमे दर्ता हुइल वैदेशिक रोजगारी सम्बन्धी समस्यामे परल ३ ठो मुद्दा दर्ता हुइल बटैली । चार पालिका मन्से धनगढीके १७, टीकापुरके ११, घोडाघोडीके ११ ओ जानकी गाउँपालिकाके १ ठो मुद्दा दर्ता हुइल कार्यक्रम अधिकृत चौधरी बटैली ।
ओम्नेसे वैदेशिक रोजगारीके क्रममे ठगुवा पाइल १७, विदेशमके मृत्यु हुइल ८, उद्धार केश ४६, जेल केश ३, सम्पर्क विहिन ७, विमारी/स्वास्थ्य समस्या २ करके ८३ ठो मुद्दा दर्ता हुइल उहाँ जनैली ।
ओस्टेक न्यायमे सहजीकरण हुके सफल हुइल ठगुवा पाइल १७ मुद्दा मन्से २ ठो सफल १५ ठो प्रक्रियामे, विदेशमके मृत्यु हुइल ८ मन्से सक्कु सफल हुइल, उद्धार केश ४६ मन्से २८ सफल हुइल १८ ठो प्रक्रियामे, जेल केशमे १ सफल २ प्रक्रियामे, सम्पर्क विहिनमे ४ ठो सफल ३ ठो प्रक्रियामे रहल ओ विमारीमे २ सफल हुइल बटैली ।
नगर प्रमुख गोपाल हमालके अध्यक्षतामे हुइल कार्यक्रममे सामाजिक विकास अधिकृत टंक विष्ट, परियोजनाके सहजकर्ता, संचारकर्मीहुकनके सहभागिता रहे । कार्यक्रमके संचालन काउन्सिलर कमला जोशी करले रहिट ।