धनगढी, १३ जेठ । अगामी स्थानीय तहके निर्वाचनमे सीमान्तकृत महिलाके सहभागिता बह्राइक लाग मिडियाके भूमिका सम्बन्धी अन्तरक्रिया हुइल बा ।
संकल्प शान्ति, न्याय ओ लोकतन्त्रके लाग महिला संजालके आयोजनामे हुइल कार्यक्रममे महिलाहुक्रनहे हरेक निकायमे अर्थपूर्ण सहभागितामे जोड डेटी ओकर लाग मिडिया विशेष प्राथामिकता डेहे पर्ना औंल्याइल रहे ।
संकल्पके अध्यक्ष अम्बिका ताम्राकार स्थानीय तह लगायत हरेक निकायमे महिलाके सहभागिता बह्रैना मिडिया महत्वपूर्ण भूमिका रहल बटैली । उहाँ विशेष कैके गाउँपालिका, नगरपालिका तथा वडा तहमे महिलाहे निर्णय प्रक्रियामे सक्रिय बनाइक लाग मिडिया प्रभावकारी माध्यम रहल ओरसे महिलाके अधिकार, नेतृत्व क्षमता, तथा राजनीतिक सहभागिताके महत्वबारे कार्यक्रम, समाचार, बहस ओ अभियान सञ्चालन कैके जनचेतना फैलैनामे सहयोगके आग्रह करल रही ।
ओस्टके उहाँ मिडियासे सफल महिला जनप्रतिनिधि, उद्यमी, समाजसेवी वा नेतृत्वकर्ताके कथा प्रसारण कैना मिडियामे महिलाके आवाजहे स्थान डेहे पर्ना बटाइल रही ।
ओस्टके उहाँ महिलाके प्रतिनिधित्व कम रहल अवस्था, विभेदपूर्ण व्यवहार वा असमानताहे उजागर कैके मिडियासे सरकार ओ स्थानीय तहहे सुधारके लाग दबाब डेना फेन अनुरोध करल रही ।
स्थानीय तहके निर्वाचनमे महिलाके सहभागिता बह्राइक लाग मिडियाके भूमिकाबारे पत्रकार अर्जुन शाह सहजीकरण करल रहिट । कार्यक्रममे संकल्पके कोषाध्यक्ष वेद अवस्थी स्वागत मनतब्य राखल रही । कार्यक्रममे संकल्पके उपाध्यक्ष भगवती हमाल, सदस्य अनिता ढुंगाना, चन्द्रा कडायत लगायतके मिडिया मार्फत सीमान्तकृत महिलाहुक्रनके आवाजहे स्थान डेहे पना बटाइल रहिट । कार्यक्रमके संचालन संकल्पके सचिव तारा चौधरी करल रही ।

कार्यक्रममे यहाँ स्थित टमान मिडियाके मिडियाकर्मीनके सहभागिता रहल रहे ।