धनगढी, १६ जेठ । कैलाली जिल्लाके कैलारी गाउँपालिका वडा नम्बर १ हसुलिया स्थित दिपेन्द्र माविमे शनिच्चरके रोज हुइल वृहत निःशुल्क स्वास्थ्य शिविरमे ५५६ जाने टमान मेरिक सेवा लेले बटै ।

कैलारी गाउँपालिका ओ स्वास्तिक कार्डियो एण्ड मल्टीस्पेसियालिटी हस्पिटल प्रालि धनगढीके संयूक्त आयोजना तथा नवजीवन सेवा संघके साझेदारी सञ्चालित वृहत निःशुल्क स्वास्थ्य शिविरमे पुरुष १२३ जाने महिला ४३३ जाने करके ५५६ जाने सेवा लेहल कैलारी गाउँपालिका स्वास्थ्य शाखा प्रमुख नरेशकुमार चौधरी जनैलै ।

स्वास्थ्य शिविरमे हाडजोर्नी सम्बन्धी २३६ जाने, सामान्य चिकित्सा सेवा २४४ जाने, नाक कान घाँटी सम्बन्धी ४२ जाने, जनरल सर्जरी २० जाने, स्त्रीरोग ३४ जाने सेवा लेहल रहिट ।

कैलारी गाउँपालिका वडा नम्बर ३ के वडा अध्यक्ष तथा सामाजिक विकास समिति सयोजक सन्तराम चौधरीके अध्यक्षतामे हुइल कार्यक्रममे प्रमुख अतिथि गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे सम्बोधन करटी उहाँ रोग नुकैना प्रवृतिसे पाछे जटिलता बह्रटी गैल बटैली ।

गाउँपालिका उपाध्यक्ष कहली ‘गाउँघरमे कोई आर्थिक अभाव, कोई कामके व्यस्तताके कारण आपन स्वास्थ्य जाँच कराई नैसेक्ठै । उहीहे मध्य नजर कैलारी गाउँपालिका ओ स्वास्तिक कार्डियो एण्ड मल्टीस्पेसियालिटी हस्पिटल प्रालि धनगढीके संयूक्त आयोजना तथा नवजीवन सेवा संघके साझेदारी वृहत स्वास्थ्य शिविरके आयोजना करल हुई ।

गाउँपालिकाबासीहुकनके स्वास्थ्यहे मध्य नजर करके गाउँपालिकासे प्रत्येक बरस निशुल्क स्वास्थ्य शिविर संचालन करटी आइल उहाँ जनैली । ओस्टेक करके उहाँ नियमित रुपमे स्वास्थ्य जाँच करैलेसे पाछे भारी समस्यासे बाँचे सेक्ना बटैली ।
वृहत निःशुल्क स्वास्थ्य शिविरमे विशिष्ट अतिथि स्वास्तिक कार्डियो एण्ड मल्टीस्पेसियालिटी हस्पिटल प्रालि धनगढीके अध्यक्ष दिपेन्द्र तिवारी रहल रहिट । कार्यक्रममे नवजीवन सेवा संघके कार्यक्रम संयोजक एकिन्द्र ठकुल्ला, फिल्ड संयोजक प्रमिन्द्र श्रेष्ठ, कैलारी गाउँपालिका स्वास्थ्य शाखा अन्र्तगतके टिम, स्वास्तिक कार्डियो एण्ड मल्टीस्पेसियालिटी हस्पिटल प्रालिके टिम, महिला स्वास्थ्य स्वम सेविकाहुकनके सहभागिता रहे । कार्यक्रमके संचालन कैलारी गाउँपालिका स्वास्थ्य शाखा प्रमुख नरेशकुमार चौधरी करल रहिट ।

यिही आघे वृहत निःशुल्क स्वास्थ्य शिविर गैल जेठ १० गते वडा नम्बर ६ स्थित बनकट्टामे संचालन हुईबेर ४४६ जाने सेवा लेहल रहिट ।