धनगढी, २ जेठ । कैलारी गाउँपालिकामे यिहे आर्थिक बर्षके असारमसान्तसम भूमिहिन दलित, भूमिहिन सुकुम्बासी ओ अव्यवस्थित बसोबासीहुकनहे जग्गाके लालपूर्जा वितरण कैना जनागिल बावै ।

कैलारी गाउँपालिका भुमि शाखाके आयोजनामे विफेक रोज हसुलियामे गाउँपालिकास्तरीय भुमि समस्या सहजीकरण समितिके पदाधिकारीहुकनहे भुमि सम्बन्धी ऐन नियम ओ कार्यविधि विषयमे हुइल अभिमुखीकरण कार्यक्रममे भुमि समस्या समाधान आयोग कैलालीके जिल्ला अध्यक्ष यज्ञराज उपाध्याय उ बारे जनाइल हुइट ।

उहाँ कहलै, ‘आयोग विगतके समितिसे फरक ढंगसे आघे बह्रे खोजल बा । भूमिहिन दलित, भूमिहिन सुकुम्बासी ओ अव्यवस्थित बसोबासीहुकनके नाउँमे फराम भरल जग्गाके नाँपजोख ओ लालपुर्जाके काम आबसंगे आघे बह्रा जाई ।’ कैलारी गाउँपालिकाके वडा नम्बर १, ५ ओ ७ मे ७ हजार २ सय कित्ता नाँपजोख हुसेकल कहटी आब नाँपजोख ओ लालपुर्जा वितरण सगसंगे लैजैना आयोगके अध्यक्ष उपाध्याय जनैलै ।

कैलारी गाउँपालिकामे नौ वडा रहल बा, सक्कु वडा नाँपजोख कैके केल्ह लालपुर्जा वितरण करब कना कल्पना करलेसे हमार मेहनत व्यर्थमे जाई, आयोगके अध्यक्ष उपाध्यक्ष कहलै, ‘मै विगतके कार्यसमितिके अनुभव करके मै यी बात शेयर करले बटु । हालसम ७ हजार २ सय कित्ताके नाँपजोख हुसेकल मने अक्कोफे लालपूर्जा वितरण करे नैसेकल हुई । टबमारे कौनो वडा नाँपी ओ लालपूर्जाफे संगसंगे वितरण करी । ओ दुसर टोलमे जाई ।
आयोगसे निश्पक्ष रुपमे नाँपजोख ओ लालपुर्जा वितरण कैना कहटी यम्ने कार्यालयके भारी भुमिका रना उहाँ बटैलै ।
उहाँ कहलै, ‘भूमिहिनहे लालपुर्जा वितरण करेपैना सुर्वण अवसर हो । यहाँके जनताके सदियो, बर्षो, पुस्तौसे समस्या बा । उ समस्या समाधान कैना अवसर जनप्रतिनिधिहुकनहे आइल बा ।’ यी ढंगसे आघे बह्रलेसे जनप्रतिनिधिप्रति जनताहुक्रे जनविश्वास बह्रना ओ यी काम अपने कार्यकालमे सम्पन्न करेक लाग पालिकासे बजेट विनियोजन कैना उहाँ आग्रह करलै ।
उहाँ कहलै, ‘मै आयोगके अध्यक्ष हुईबेर कैलालीके १३ स्थानीय तहमन्से पाँच ठो पालिकामे केल्ह आयोगके प्राविधिक पठैले रही । ओम्ने पहिल प्राथमिकता कैलारी गाउँपालिकामे डेहल हो । सबसे ढेर समस्या कैलारी गाउँपालिकामे बा । यी समस्या यिहे जनप्रतिनिधिहुकनके पालामे समाधान होए कना आयोगके चाहना रहे ।’
भूमि समस्या समाधानके लाग गाउँपालिका, वडा कार्यालय ओ जनप्रतिनिधिसे चाहके केल्ह नैहुई यम्ने सक्कु राजनीतिक दलके सहयोग, भूमिका महत्वपूर्ण रना उहाँ बटैलै ।
कैलारी गाउँपालिकाके अध्ययक्ष राजसमझ चौधरी यहाँ लाजपूर्जा वितरण कैना अवसर ओ चुनौती ढेर रहल बटैलै । उहाँ कहलै, ‘हमार पालिकामे बाढ पीडित, मुक्तकमैया ओ सुकुम्बासी समस्या बा । टबमारे ढेर चुनौतीफे बा । यी चुनौतीके सामाना कैना पालिका, वडा कार्यालय, जनप्रतिनिधि केल्ह नाही सक्कु राजनीतिक दलके भूमिका अहम बा । पालिका सक्कु राजनीतिक दलके सल्लाह ओ सुझाव अनुसार आघे बह्री ।’
गाउँपालिका अध्यक्ष कहलै, ‘उ जग्गासे उठना राजश्व केन्द्र ओ स्थानीय तह पचास÷पचास प्रतिशत लेहे पैलेसे स्थानीय तहकेफे विकास हुइना रहे ।’
गाउँपालिका उपाध्यक्ष भगवतीकुमारी चौधरी नाँपजोख संगे लालपूर्जा वितरण कैना आग्रह करली । उहाँ कहली, ‘अब्बे तीन ठो वडामे नाँपजोख हुसेकल बा । यकर लालपूर्जा वितरणके सुरुवाट करलेसे मजा सन्देश जैना ओ आयोग काम करल कना जनविश्वास बह्रट ।’
आयोगके केन्द्रीय सदस्य कमलसिंह राना आयोगसे भूमिहिनहे आवासके लाग १ कटठा ओ कृषि कार्यके लाग पाँच कटठा जग्गा उपलब्ध कराईबेर राजश्व नैलग्ना बटैलै । ओस्टेक करके उहीसे ढेर जग्गा रहलेसे अव्यवस्थित बसोबासीके फाराम भरे पर्ना बटैलै । ओकर लाग आवासके लाग ३ कटठा ओ कृषि कार्यके लाग डेढ विघा केल आयोगसे डेना बटैलै । ओकर लाग पाँचसे १० प्रतिशत राजश्व तिरेपर्ना बटैलै । उहाँ कैलारीमे अन्तिम पटकके लाग कोई छुटल बा कलेसे फारम खुल्ना बटैलै । १० बर्ष भोग चलन हुइल जग्गा केल्ह नाँपजोख हुइना उहाँ बटैलै ।
कार्यक्रममे आयोयके प्राविधिक विरेन्द्र सिंह, वडा नम्बर ५ के वडा अध्यक्ष विष्णु प्रसाद चौधरी, राप्रपाके पिङगला थारु, वडा नम्बर ७ के वडा अध्यक्ष दिपेन्द्र बहादुर बम, वडा नम्बर ४ के वडा अध्यक्ष ठागुराम चौधरी, नेकपा एमाले प्रतिनिधि होरीलाल चौधरी, नेपाली काँग्रेसके प्रतिनिधि मनिराम चौधरीलगायतसे आयोगके कामहे आघे बह्रैना ओ लालपूर्जा हाली वितरण कैना आग्रह करल रहिट ।
कार्यक्रममे प्रमुख प्रशासकीय अधिकृत खगेन्द्रराज जोशी, वडा अध्यक्षहुक्रे, गाउँपालिकास्तरीय भुमि समस्या सहजीकरण समितिके पदाधिकारीहुक्रे, आयोगके सदस्य रामकुमारी चौधरी, दानबहादुर विश्वकर्मा, प्राविधिक कर्मचारीहुकनके सहभागिता रहे । कार्यक्रमके संचालन कैलारी गाउँपालिका भुमि शाखा प्रमुख यगम कलेल करल रहिट ।