धनगढी, १७ जेठ । बस्ती बचैना माग सहित मुक्तकमैयाहुक्रे कैलारी गाउँपालिकाके अध्यक्ष राजसमज चौधरीहे ज्ञापन पत्र बुझैले बाटै ।
मुक्त कमैया समाज कैलारी ओ कमैया महिला जागरण समाज कैलालीके अगुवाइमे बुधके रोज कैलारी गाउँपालिका स्तरिय मुक्तकमैया पुर्नस्थापना समस्या समाधानके लाग आन्दोलन सहित पुगल टोलीसे ज्ञापनपत्र बुझाइल हो ।
मुक्त कमैया समाजके जिल्ला सचिव विनोद चौधरी वडा नम्बर ७ स्थित मिलनपुर मुक्तकमैया बस्तीहे हटैना षडयन्त्रहे तत्काल बन्दकरे पर्ना, कमैयाहुक्रनके पहिचान कैके परिचय पत्र व्यवस्थाके साथे बैठल स्थानमे जग्गा दर्ता कैके लालपुर्जा डेहे पर्ना पाँच बुँदे माग सहित ज्ञापन पत्र बुझाइल बटैलै ।

ओस्टके उहाँ परिचय पत्र पाइल कमैया ओ भूमि आयोगसे निस्सा पाइल छुट मुक्त कमैयाहुक्रनके सुरक्षित बैठ्ना वातावरण बना डेहे पर्ना, लाल पुर्जा पाके फेन टमान कारणसे जग्गा उपभोग करे नैपाइल परिवारहे पाइल जमिनमे बैठ्ना वातावरण मिला डेहे पर्ना ओ कमैयाहुक्रनके बालबालिकाके लाग शिक्षा, स्वास्थ्य, रोजगार, बस्ती विकास ओ जिविकोपार्जनके लाग अनिवार्य बजेट विनियोजनके व्यवस्था करे पर्ना माग रहल बटैलै ।
ज्ञापन पत्र बुझैटी सचिव चौधरी सव डिभिजन वन कार्यालय बसन्तासे बस्ती उठैना जारी करल सात दिने सूचनाहे लेके कमैयाहुक्रे त्रसित हुइल बटैलै । वर्षौसे बसोबास कैटी आइल बस्तीहे एकफाले हटैना सूचना प्रति आक्रोस पोख्ती उहाँ बस्ती उठैले जैसिन फेन मुल्य चुकैना तयार रहल बटैलै ।
वन कार्यालय बसन्तासे गैल बैशाख २१ गते वडा नम्बर ७ स्थित पुरुव ओर पुरैना सामुदायिक वन, पश्चिउ रत्ना सामुदायिक वन, उत्तर हुलाकी सडक खण्ड ओ दख्खिन ओर विपतपुर गाउँ तथा मोहना लडिया ओत्र चार किल्ला भिट्टरके घर टहरा हटैना सात दिने सूचना जारी करल रहे ।

यहोर गाउँपालिका अध्यक्ष राजसमझ चौधरी मुक्त कमैयाहुक्रनसे राखल माग जायज रहल बटैटी पुरा कैना प्रतिवद्धता जनैले बाटै ।
‘अपनेहुक्रे आपन बस्ती बचाइक लाग राखल माग सहित अन्य माग फेन जायज रहल बा’, अध्यक्ष चौधरी कहलै, ‘स्थानीय तहसे सम्बोधन हुइना मागके लाग मोर ओरसे सहयोग रही कना प्रतिवद्धता रहल बावै ।’
ओस्टके अध्यक्ष चौधरी मुक्त कमैयाहुक्रनके आन्दोलनमे आपन फेन साथ सहयोग रहल बटैटी मुक्त कमैयासे बसोबास कैटी रहल ठाउँहे नापजोखके लाग निर्देशन समेत डेहल बटैले बाटै ।
‘बास्तवनमे अपनेहुक्रनके आन्दोलन कैना रहर नैहोके बाध्यता हो’, अध्यक्ष चौधरी कहलै, ‘वन कार्यलयसे घरी घरी अपनेहुक्रनहे उठैना कहटी डर त्रास डेखैटी बा मने अपनेनके साथमे स्थानीय सरकार रहल बा । स्थानीय सरकारके प्रमुखके नातासे मै अपनेन्के बैठल ठाउँहे नापजोखके लाग निर्देशन फेन डेसेकल बाटुँ ।’