२ असार २०८१, शनिबार June 15, 2024

दहित गोट्यार समाज कैलालीके सम्मेलन, दलबहादुरके नेतृत्वमे लौवा कार्यसमिति चयन

१ जेष्ठ २०८१, मंगलवार
दहित गोट्यार समाज कैलालीके सम्मेलन, दलबहादुरके नेतृत्वमे लौवा कार्यसमिति चयन

धनगढी, १ जेठ । कैलाली जिल्लाके पटेलामे दहित गोट्यार समाज कैलालीके सम्मेलन मंगरके रोज निम्जल बा ।
दलबहादुर दहितके घर गोस्यामे हुइल सम्मेलनके बरका पहुना पूर्व भूमिसुधार मन्त्री संविधानसभा सदस्य डा. गोपाल दहित रहल रहिट । कलेसे विशिष्ट पहुना सुदूरपश्चिम प्रदेशसभा सदस्य माननीय गीता चौधरी(दहित), कैलारी गाउँपालिका उपाध्यक्ष भगवतीकुमारी चौधरी(दहित) ओ थारु कल्याणकारिणी सभाके केन्द्रीय सदस्य जिउलाल दहित रहल रहिट ।
कार्यक्रममे सम्बोधन करटी डा. गोपाल दहित थारु समुदायभिटर ४२ ठो दहित डेखा परल मने सक्कु जाने अक्के दहित रहल बटैलै । उहाँ समय परिस्थिति ओ ठाउँ अनुुसार पुजा बडलल, ठपल कारण फरक डेखल मने मरणीकरणीके अक्के मेरिक चालचलन रहल, दहित विच भोज करे नइबन्ना बटैलै ।


सुदूरपश्चिम प्रदेशसभा सदस्य माननीय गीता चौधरी(दहित) अब्बेक पुस्ता अपन रिति संस्कृतिबारे सक्कु ज्ञान नइरहल ओ ओइनके भावी पुस्ताहे झन रिति संस्कृतिबारे पत्ता नइहुई हुई सेक्ना बटैली ।
कैलारी गाउँपालिका उपाध्यक्ष भगवतीकुमारी चौधरी(दहित) रिति संस्कृतिहे पुस्तान्तरण करे नइसेक्लेसे रिति संस्कृति लोप हुइना बटैली । उहाँ रिति संस्कृतिहे दस्तावेजीकरण करलेसे भावी पुस्तासम उ रिति संस्कृति हस्तान्तरण करे सेक्ना बटैली । दहित थारु समुदायके महिलाहुक्रे सक्कु पूजा पुजना ओरसे अपन देउटानके नाउँ पत्ता हुई पर्ना बटैली ।
कार्यक्रममे थारु कल्याणकारिणी सभाके केन्द्रीय सदस्य जिउलाल दहित, भल्मन्सा जगतराम दहित, होमस्टे महासंघ सुदूरपश्चिम प्रदेश अध्यक्ष दिनेश दहित लगायत मन्तव्य राखल रहिट । कार्यक्रमके संचालन अनु दहित ओ चन्द्रा दहित करल रहिट । कलेसे स्वागत मन्तव्य कलकसिंह दहित करले रहिट ।
सम्मेलनसे दलबहादुर दहितके अध्यक्षामे लौवा कार्यसमिति चयन कैगिल बा । समितिके उपाध्यक्षमे दिनेश दहित, सचिवमे राम प्रसाद दहित, सहसचिवमे चन्द्रा दहित ओ कोषाध्यक्षमे धर्मसिंह दहित रहल बटै ।
ओस्टेक सदस्यमे जगत दहित, तबिराम दहित, राजन दहित, सुरेन्द्र दहित, बेचनलाल दहित, हिरा दहित, श्रीराम दहित, महाविर दहित, जगत चौधरी ओ लहानु चौधरी रहल बटै । ओस्टेक बाँकी रहल सदस्यहुकनहे समितिके पहिल बैठकसे पूर्ति कैना अध्यक्ष दलबहादुर दहित बटैलै ।