धनगढी। अपन भासा, संस्कृति, साहित्य संरक्षण सम्बर्द्धनके लाग कैलालीमे बसोबास रहल ठाकुर कुस्मी थारुनके गोटियार सम्मेलन हुइक लाग बा ।

हरेक साल हुइना ठाकुर कुस्मी थारु सम्मेलन इ साल गौरीगंगा नगरपालिका ८ ऐंठा गाउँमे इहे जेठ २१ गते हुइना आयोजक जनाइल । अपन भासा, संस्कृति, साहित्य, परम्परा, रीतिरिवाज संरक्षण ओ सम्बर्द्धन कैना उदेश्य से हरेक साल सम्मेलन हुइटि आइल बा ।

गैल २ बरस कोरोना माहामारीसे रुकल सम्मेलन इ साल पहिलेकसे परिमार्जित कैके कार्यक्रम कैना ठाकुर कुस्मी गोटियार समाजके अध्यक्ष खुशीराम चौधरी बटैलैं ।
उहाँ कहलैं, हम्रे हरेक साल हमार कुस्मी थारु गोटियारीनके सल्लाहसे सम्मेलन कर्टी आइल बटि ।

उहाँ पहुरा थारु दैनिकहे जनैटी कहलैं, एक घरसे एक सदस्यके हिसाबसे हरेक साल २ हजार लेबी उठैटी आइल बटि । उठल लेबीसे अपने गोटियार भित्रे सहुलियत दरमे लगानी कर्टी आइल उहाँ बटैलैं ।

स्थापना कालसे ठाकुर कुस्मी थारु लोग अपने गोटियार भित्रे टमान कार्यक्रम कर्टी आइल बा । भोज बियाह, मर्निकर्नी लगायत टमान सामाजिक कामके लाग ठाकुर कुस्मी थारुनके एकता, सद्भाव ओ मजा सम्बन्ध रहल बटिन ।

समाजके सचिब बलराम चौधरी कहलैं, गोटियार सम्मेलन कैके अब्बे हमार गोटियार ढेर जागरुक ओ सचेत हुइल बटैलैं । जिहिसे लावा पिढीके पुस्टा फेन थारु संस्कृति बारेमे हरेक जानकार हुइटी रहल उहाँ बटैलैं ।

लोप हुइटी रहल ठाकुर कुस्मी थारुनके डेउडुर्गा, रीतभाँठ, चालचलनके बारेमे लिखित रुपमे दस्तावेज कैना कोषाध्यक्ष हरिप्रसाद चौधरी बटैलैं । कोरोनाके महामारीसे प्रभावित हुइलेक ओर्से लगानी करल रकमके सावाँ किल बुझाइ पर्ना उहाँ बटैलैं । इ साल सावाँ ओ लेबी किल बुझाइ पर्ना उहाँ बटैलैं ।

२०६५ सालसे लगातार सम्मेलन हुइटी आइल २०७७/०७८ सालमे कोरोनाके कारण स्थगित हुइल सम्मेलन इ साल भव्य ओ सभ्य रुपमे कार्यक्रम लौसर्ना आयोजक जनैले बा । कैलाली जिल्लामे डख्खिन टेंर्ही, ऐंठा, मन्कापुर, शिवपुर, बर्हैपुर, उदासीपुर, राजिपुर, अम्बासा, लालबोझी गाउँ ओ कंचनपुरके नौखरी गाउँमे ठाकुर कुस्मीनके बसोबास रहल बटिन ।

इहिसे पहिले रामनाथ चौधरी, छेदुराम चौधरी अध्यक्ष होके इ समाजहे हाँक सेक्ले बटैं कलेसे अब्बे खुशीराम चौधरी हँक्टी बटैं । इहे सम्मेलनसे लावा कार्य समिति फेन चयन कैना आयोजक बटैले बा । सम्मेलन ऐंठा, मन्कापुर ओ टेंर्ही गाउँ पालिक पाला हुइटी आइल बा ।

अइना दिनमे नुकल छुपल गोटियारीनके खोजी कैना समाजके अध्यक्ष खुशीराम चौधरी बटैलैं ।