९ जेष्ठ २०८१, बुधबार May 22, 2024

कैलारीमे व्यक्तिगत घटना दर्ता सप्ताह मनागिल

७ बैशाख २०८१, शुक्रबार
कैलारीमे व्यक्तिगत घटना दर्ता सप्ताह मनागिल

हसुलिया, ७ बैशाख । व्यक्तिगत घटना दर्ता सप्ताह अन्र्तगत कैलालीके कैलारी गाउँपालिका शुकके रोज व्यक्तिगत घटना दर्ता सप्ताह मनागिल बा ।
गाउँपालिकाके वडा नम्बर १ मे व्यक्तिगत घटना दर्ताबारे प्रभातफेरी ओ अन्तरक्रिया कार्यक्रम सहित सप्ताह मनागिल हो । कैलारी गाउँपालिका ओ एनएनएस डब्ल्यूएके आयोजनामे हुइल कार्यक्रमके घरगोसिया वडा नम्बर १ के कार्यवाहक अध्यक्ष तुलसी राम चौधरी रहल रहिट ।
कार्यक्रममे पञ्जीकरण शाखाके अनुषा चौधरी कार्यक्रमके उद्देश्यबारे जानकारी कराइल रही । उहाँ सहभागीहुक्रनहे व्यक्तिगत घटना दर्ताबारे जानकारी कराइल रही । उहाँ व्यक्तिके कानुनी पहिचान ओ राज्यसे प्रवाह हुइना टमान सेवा प्राप्तीके लाग जन्म, मृत्यु, विवाह, बसाइँसराइ, सम्बन्ध विच्छेद लगायतके व्यक्तिगत घटना घटना घटल ३५ दिन भित्रे आआपन वडा कार्यालयमे दर्ता करे पर्ना आग्रह करल रही । ओस्टके उहाँ सामाजिक सुरक्षाके बारेम फेन जानकारी कराइल रही ।


कार्यक्रममे जनप्रतिनीधी, बरघर भलमन्सा, स्वाथ्य चौकी शाखा प्रमुख, महिला स्वास्थ्य स्वयम सेविका, दिपेन्द्र माविके शिक्षक नारायण ढकाल, विद्यार्थीहुक्रनके उपस्थिति रहल पञ्जीकरण शाखाके निलम चौधरी जानकारी डेली ।
नेपाल सरकार तथा गृह मन्त्रालय राष्ट्रिय परिचयपत्र तथा पञ्जीकरण विभाग अन्र्तगत बैशाख १ गतेसे ७ गतेसम व्यक्तिगत घटना दर्ता सप्ताह सक्कु स्थानीय तहमे सञ्चालन हुइल बा ।
व्यक्तिके कानूनी पहिचान स्थापित कैना, राज्यहे नीति निर्माण कैना ओ राज्यसे प्रवाह हुइना सेवा प्राप्तीके लाग व्यक्तिगत घटना दर्ता आवश्यक रहल ओरसे उ सम्बन्धी जनचेतना अभिवृद्धि करक लाग प्रत्येक बरस बैशाख महिनाके पहिल अँठ्वार व्यक्तिगत घटना दर्ता सप्ताह मनैटी आइल बा ।