धनगढी, १७ चैत । दहित गोत्यार समाज कैलालीके जिल्ला अधिवेशन तथा सम्मेलनके तयारीके लाग शनिच्चरके रोज धनगढीके तारानगरमे टमान विषयबस्तुमे छलफल कैगिल बा ।
दहित गोत्यार समाज कैलालीके जिल्ला सदस्य जागुराम दहितके अध्यक्षतामे हुइलक बैठकमे कैलालीके जिल्ला अधिवेशनके मिति, स्थान ओ टमान मेरिक नीतिगत एजेन्डा तयार करेक लाग बैठक हुइल हो । कार्यक्रममे जिल्लास्तरीय सम्मेलन तथा अधिवेशनके लाग सक्कु जानेक पायक पर्ना ठाउँमे रख्ना सुझाव डेगिल रहे । सहभागीहुक्रे सम्मेलनके तयारीके लाग सक्कु जाने सहयोग कैना प्रतिवद्धताफे जनाइल रहिट ।
अब्बे गोहुँ, मसरी कटना ओ भित्रैना समय रहल कहटी सम्मेलन बैशाखके १५ से २० गतेक विचमे कैना सुझाव आइल रहे । सम्मेलन तथा जिल्ला अधिवेशनके लाग सक्कु गाउँसे एक÷एक जाने जिम्मेवार व्यक्तिफे तोकल बा । उहाँहु्क्रे अपन गाउँमे समन्वय कैना, प्रचार प्रसार कैना जिम्मा रहल दहित गोत्यार समाजके अगुवा दलबहादुर दहित जनैलै ।
उहाँ कहलै, ‘हमार रिति संस्कृति पहिचान हेरैटी गैल बा । उहीहे संरक्षणके लाग सम्मेलनके आवश्यकता बा । सम्मेलन करके रिति संस्कृतिके बारेमे वृहत रुपमे छलफल करके उहीहे दस्तावेजीकरण कैना जरुरी बा ।’
समाजके अगुवा सुर्य प्रसाद दहित और समुदाय अपन गोत्र पहिचान करके रिति, संस्कृति, पहिचान संरक्षणमे लागल ओरसे दहितथारुहुक्रेफे आघे सरना जरुरी रहल बटैलै । उहाँ दहितथारुहुकनके अवस्था, घरधुरी ओ जनसंख्याके तथ्याङक रख्ना जरुरी रहल बटैलै ।
बैठकमे धनगढी उपमहानगरपालिका–८ के वडा अध्यक्ष समेट रहल जुगराम दहितसहितके कैलाली जिल्लाके टमान गाउँक करिब १०० जानेक सहभागिता रहे ।
दहित गोत्यार समाजके जिल्ला अधिवेशन तथा सम्मेलनके लाग मिति ओ ठाउँ चाही गाउँ–गाउँसे तोकल जिम्मेवार व्यक्तिहुकने बैठकसे तोक्ना जनागिल बा । दहित गोत्यार समाजके लाग कोष स्थापना, अधिवेशन तथा सम्मेलनके लाग सदस्यता शुल्क/सहयोग स्वरुप प्रतिघरसे रु ५ सय रुप्या उठैना सल्लाहफे कैगिल बा ।