धनगढी, २६ माघ । कैलाली निर्वाचन क्षेत्र नं. ५ से स्वतन्त्र उम्मेदवारी डेहल प्यारेलाल राना आपन चुनावी घोषणापत्र लन्ले बटै ।
अइना फागुन २१ गते हुइना प्रतिनिधी सभा सदस्य निर्वाचन अन्तरगत उम्मेदवारी डेहल राना चुनावी घोषणापत्र लानल हुइट । उहाँके घोषणापत्रमे जनताके आधारभूत आवश्यकता सुनिश्चितता, पारदर्शी ओ भ्रष्टाचारमुक्त शासन व्यवस्था स्थापनामे मुख्य जोड, कृषि उत्पादन ओ मल सिँचाइके व्यवस्थापनमे विशेष जोड, कृषि उत्पादनके उचित मुल्यांकन ओ बजार प्रबद्र्धन रहल बा ।
ओस्टके फाप्ला अन्तर्राष्ट्रिय क्रिकेट मैदान निर्माणमे विशेष दवाव, सुदूरपश्चिम प्रदेशके पहिचान स्वभिमान ओ साँस्कृतिक पर्यटन विकासके लाग साझा साँस्कृतिक मञ्चहे संस्थागत कैके संघीय सरकारके नियमित योजनामे समेट्ना, भौतिक विकास सँगे मानवीय बेतिथी, कुलत, बेरोजगारी, सामाजिक विकृति जैसिन चीजहे मानवीय विकास कार्यक्रम सञ्चालन कैके समृद्धि ओ समुन्नत समाजके आधार तयार कर्ना रहल बा ।
ओस्टके टीकापुर घटना विशुद्ध राजनीतिक घटना रलेसे राज्यसे आपराधिक घटनाके रुपमे लेहल ओरसे उ घटनाके छानविन कैना बनल लाल आयोगके प्रतिबेदन सार्वजनिक कैटी न्यायोचित तरिकासे दीर्घकालीन सामाधानके लाग पहल कैना, सामाजिक न्याय ओ समावेशिताहे विशेष जोड डेके महिला, दलित, आदिवासी, जनजाति, थारु, रानाथारु, मुस्लिम, खस–आर्य, गरिब, पिछडल वर्ग, अपाङ्गता रहल व्यक्ति लगायत सक्कु जनहनके कानुनी अधिकार संरक्षण ओ व्यवहारिक बनैना पहल कैना घोषण पत्रमे उल्लेख रहल बा ।
गुणस्तरीय, निःशुल्क आधारभूत ओ रोजगारमुखी प्राविधिक तथा सीपमूलक शिक्षामे जोड, हाल हुइटी रहल कागजी प्रक्रिया पुगाके पहुँचवालाहे अनुदान, बितरण जैसिन सरकारी सहुलियतहे वास्तविक किसान, गरिब पहिचान कैके सहुलियतहे प्रभावकारी बनैना, सरकारी अस्पताल तथा स्वाथ्य केन्द्रहे सुविधाजनक ओ सहज बनैना, सत्ताके लाग हुइटी रहल अनैतिक गठबन्धन÷दलीयकरणहे संविधान संशोधनमार्फत स्थायित्व एवं दिगो समाधान ओ लोकतान्त्रिक माध्यमसे राष्ट्रके स्वभिमान ओ समृद्धिके आधार तयार कैना ओ अन्तिम बुँदामे विकासके लाग स्थानीय जनताके गुनासो, सुझाव, सम्पर्क, समन्वय सम्पर्क बह्राइक लाग स्थानीय प्रतिनिधि सम्पर्क व्यक्ति खटाजैना ओ समयानुकूल स्वयं उपस्थित होके जनगुनासो नियमित सुन्ना प्रतिवद्धता व्यक्त करले बटै । साथे उहाँ मुक्त कमैया ओ सुकुमवासीके समस्या समाधानके लाग पहल कदमी कैना फेन बुँदामे समेट्ले बटै ।