हसु्लिया, १ फागुन । कैलाली जिल्लाके कैलारी गाउँपालिका वडा नम्बर १ के वडा कार्यालयके नवनिर्मित वडा कार्यालय भवनके एक कार्यक्रमके बिच विफेक रोज उद्घाटन कैगिल बा ।

हसुलिया बजारमे बनल लावा भवनके उद्घाटन कैलारी गाउँपालिकाके अध्यक्ष राजसमझ चौधरी रिवन काटके करल रहिट । भवन उदघाटन कार्यक्रममे सम्बोधन करटी गाउँपालिका अध्यक्ष राजसमझ चौधरी वडा कार्यालयके अपने भवन बनलपाछे काम कैना सहजता हुइना बटैलै । उहाँ कहलै, ‘अभिनसम नौ वडा मध्ये १ नम्बर वडा कार्यालयके केल अपने भवन नैरहे । उ कार्यालयसे भाडामे कोठा लेके साँकसिँक ठाउँसे सेवा प्रदान करटी आइल रहे । अब्बे भवन बनलपाछे सेवा ग्राहीहुकनहे सेवा प्रदान कैना सहजता हुई ।’

नवनिर्मित भवन उदघाटन कार्यक्रममे गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, वडा नम्बर १ के वडा अध्यक्ष धोजहरिपाल बोहरा, वडा नम्बर ३ के वडा अध्यक्ष सन्तराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ८ के वडा अध्यक्ष तारामल कठरिया, वडा नम्बर १ के वडा सदस्य लिलापति चौधरी, शिकारी चौधरी, योजना शाखा प्रमुख सन्तोषकुमार चौधरी, लेखा शाखा प्रमुख दिपेन्द्र चौधरी, नेपाल तरुण दलके रेणु चौधरीm लगायतके सहभागिता रहल वडा सचिव रामचन्द्र चौधरी जानकारी डेलै ।

भवनके उदघाटन हुइलपाछे वडा नम्बर १ के कार्यालयसे अपने भवनसे सेवा प्रदान सुरु करले बा ।