धनगढी, २२ माघ । धनगढीमे प्रथम सुदूरपश्चिम प्रदेश स्तरीय कृषि तथा पशुपन्छी मेला प्रर्दशनी २०८१ हुइना हुइल बा ।
प्रदेश सरकार भुमि व्यवस्था कृषि तथा सहकारी मन्त्रालयके आयोजनामे इहे माघ २६ गतेसे ३० गतेसम धनगढी १ पशुपति टोल स्थित मेला आयोजना हुइना हुइल हो । कृषि विकास निर्देशनालय राजपुर डोटीके आयोजनामे सोम्मारके धनगढीमे पत्रकार सम्मेलन मार्फत कृषि प्रर्दशनी बारे जानकारी करागिल बा ।
“सदूरपश्चिम प्रदेशके समृद्धिके लाग समग्र कृषि क्षेत्रके आधुनिकीकरण, व्यसायीकरण, विविधिकरण ओ औद्योगिकीकरण“ कना मूल नारा सहित कृषि मेला आयोजना करे लागल निर्देशनालयके महानिर्देशक खगेन्द्र प्रसाद शर्मा जानकारी डेलै ।
मेलाके मुख्य उद्देश्य प्रदेशके कृषि पशुपन्छी ओ मत्स्य विकासके क्षेत्रमे हुइल प्रगति ओ नविन प्रविधिके प्रदर्शनी, विषय विज्ञहुक्रनसे अन्तरक्रिया लगायत कृषक, कृषि समूह सहकारी, कृषि व्यवसायी ओ उद्योगीहुक्रनहे उपस्थित कराके समन्वय ओ सहकार्य कैना रहल महानिर्देशक शर्मा बटैलै ।
ओस्टके प्रदेशमे उत्पादित कृषि, पशुपन्छी तथा मत्स्यजन्य सामाग्रीके उचित मुख्यमे विक्री कैना वातावरण मिलैनाके साथे उपभोक्ताहे लाभान्वित कैना ओ गैर काष्ठ तथा वन पैदावार तथा घरेलु एव साना उद्योगसे उत्पादित सामाग्रीके प्रर्दशनी ओ विक्रिवितरणके साथे स्थानीय कला संस्कृतिके प्रर्वद्धनमे टेवा पुगैना रहल जनाइल बा ।
कलेसे प्रदेशके ९ जिल्लामे उत्पादित कृषि, पशुपन्छी ओ मत्स्य बाली वस्तु रैथाने स्थानीय समेतके अवलोकन करे पैनाके साथे खरिद विक्री फेन करे पैना प्रर्दशनीके मुख्य आकर्षण रहना जनाइल बा ।
मेला तथा प्रर्दशनीमे निःशुल्क सहभागि हुइ पैना ओ अवलोकन करे पैना जनाइल बा । १५० ठो स्टल रहना मेला तथा प्रदर्शनी आयोजनाके लाग ३५ लाख खर्च हुइना जनाइल बा कलेसे एक करोडसे ढेर करोबार हुइना अपेक्षा करल बा ।
ओस्टके प्रदेशके ७ जिल्लाके ८८ स्थानीय तहसे कम्तिमे ४ हजार पाँचसय अगुवा कृषक ओ १ लाख ५० हजार से ढेर आम उपभोक्ता मेला प्रदर्शनीके प्रत्यक्ष अवलोकन कैना जनाइल बा ।
ओहे अवरसमे कृषि, पशुपन्छी ओ मत्स्य क्षेत्रके टमान विधाके विकास ओ विस्तारके लाग महत्वपूर्ण योगदान डेटी रहल प्रदेशके उत्कृष्ट कृषि व्यवसायीहे सम्मान फेन करजैना जनाइल बा ।