धनगढी । धनगढी उपमहानगरपालिका–८, गुरही चौकमे लाइट टावर निर्माण करल बा । सोम्मारके उ लाइट टावरमे नेपालके राष्ट्रिय झण्डोत्तोलन कैगिल बा । सुदूरपश्चिम प्रदेश प्रमुख देवराज जोशी लाइट टावरमे झण्डोत्तोलन करल रहिट । धनगढी उपमहानगरपालिकाके लगानी ओ वडा कार्यालयके सहकार्यमे बनल लाइट टावर सार्वजनिक महत्व ओ राष्ट्रिय गौरवके विषय रहल प्रदेश प्रमुख जोशी बटैलै । उहाँ इ मेरके कार्य औरे वडा फेन सिके पर्ना औँल्याइल रहिट ।
धनगढी उपहानगरपालिकाके नगर प्रमुख नृप बहादुर वड लाइट टावरके धनगढीके सात ठाँउमे स्थापना करेक लाग सर्वे हुइटी रहल बटैलै ।
लाइट टावर ट्राफिक चौराहा, पार्कमोड, रातोपुल, सहिद गेट, वडा नम्बर ७ के वडा कार्यालय लग्गे, फुलवारीमेफे स्थापना कैना जनाइल बा । ५६ फिट ढेङ रहल लाईट टावर २ लाख ७५ हजार लागतमे बनल जनाइल बा ।

यहोर गुरही चौकमे निर्माण हुइल लाइट टावरमे क्याम्पस चौक लिखल प्रति थाकस कैलाली ध्यानाकर्षण जनैले बा । थाकस कैलाली उपसभापति माधव थारु लाइट टावरमे क्याम्पस चौक लिखल प्रति ध्याकार्षण जनाइल हुइट । धनगढी स्थित गुरही चौकमे विगत वर्षौसे गुरही टिहुवार मनैटी आइलमे उ ठाउँके पहिचान नामेट कैना उद्देश्यसे लाइट टावरमे क्याम्पस चौक लिखल बटैलै ।
उपसभापति थारु आपत्ति जनैटी उ कार्यहे तत्काल सुधार करे पर्ना सहितके वडा कार्यालयहे ध्यानाकार्षण पत्र बुझैना जनैले बाटै ।
लाइट टावरमे लिखल क्याम्पस चौक प्रति समाजिक सञ्जाल मार्फत फेन विरोध जनाइल बा । टावरमे लिखल क्याम्पस चौकसे थारुउपर अतिक्रमण, थारु भाषा कला संस्कृति, नामाकरण, धर्म, अस्तित्व मेटाइ खोजल कहटी विरोध जनाइल बा । कलेसे थारु बाहुल स्थानमे थारुनके पहिचान बोकल चौक हुइ पर्ना औंल्याइल बा ।