धनगढी, ९ माघ । कैलारी गाउँपालिका वडा नम्बर ३ उत्तर भर्रीमे स्वर्गिय पतिराम स्मृति रनिङ फुटबल प्रतियोगिता सुरु हुइल बा ।
निम्हान गोतियार परिवारके आयोजनामे सुरु हुइल प्रतियोगिताके उद्घाटन कैलारी गाउँपालिकाके अध्यक्ष राजसमझ चौधरी करल रहिट । कार्यक्रमहे सम्बोधन कैटी उहाँ गायक स्वर्गिय पतिराम चौधरी गाँउँपालिकाके एकठो गहनाके रुपमे रहल बटाइल रहिट । उहाँक योगदानसे थारु भाषा, संस्कृति संरक्षणमे टेवा पुगल कहटी उहाँ सम्झनाहे सदैव जीवन्त राखक लाग हरेक बरस प्रतियोगिता जारी रख्ना आग्रह करल रहिट ।
अध्यक्ष चौधरी प्रतियोगिताके लाग व्यक्तिगत नगद २० हजार सहयोग फेन कैना जनैले बटै । साथे अध्यक्ष चौधरी स्वर्गीय चौधरीके नाउँमे डगराके नामाकरण फेन कैना जनैलै ।
वडा नम्बर ४ के वडा अध्यक्ष ठागुराम चौधरी स्वर्गिय पतिराम चौधरी सस्कृतिके माध्यमसे कैलारीमे ढेर योगदान पुगाइल चर्चा करल रहिट ।
कैलाली जिल्ला फुटबल संघके सदस्य मनिराम चौधरी गायक स्वर्गिय पतिराम चौधरी बहुआयमिक, समाजसेवी ओ संस्कृतिमे योगदान पुगल बटाइल रहिट ।
कैलारी–३ भर्रीके भल्मन्सा छोटेलाल चौधरी पहिले डिजिटल युग नैरहल ओरसे असरक डगर गीति एल्बममे निकारेक लाग भारत गैलबेला उहाँक दुःखद निधन हुइल बटाइल रहिट । उहाँ कहलै, गायक स्वर्गिय पतिराम चौधरी मोर लङगुटिया संघरीया रहिट । संगे खैना संगे सुटना, ओ थारु भाषा कला, संस्कृति जोगाइक लाग संगसँगे नेग्ना करिट उहाँक इ संसारसे गैलपाछे अपुरणिय क्षति पुगल बा । उहाँकमे अदभुत कला रहे ।
कार्यक्रममे योङ ब्वाइज क्लवके पूर्व सचिव लिखराम चौधरी स्वर्गिय पतिराम चौधरीके योगदान कबु विस्राई नैसेक्ना छाप बनल बटाइल रहिट । उहाँ कैलारी गाउँपालिकाके विभुतिके रुपमे रहल बटाइल रहिट ।
स्वर्गिय पतिराम चौधरीके बहिनीय बालिका चौधरी स्मृति कपहे निरन्तरता डेना जरुरी रहल बटाइल रही । कार्यक्रममे स्वागत तथा स्वर्गिय पतिराम चौधरीके जीवनीबारे थारु लेखक संघ कैलालीके सहसचिव दिनेश चौधरी डेहल रहिट । स्वर्गिय पतिराम चौधरीके जलम २०३४ साल कार्तिक २७ गते कैलारी गाउँपालिका ३ भडरीमे हुइल रहे । कलेसे उहाँ २०५८ साल पुस २५ गते भारतमे मृत्यु हुइल रहे । उहाँक थारु भाषक पहिल गिति एल्बम माधे ओ डुसरा असरक डगर हो ।
कार्यक्रम स्वर्गिय पतिराम चौधरीके डाडा हरिराम चौधरीके अध्यक्षतामे हुइल रहे कलेसे संचालन गायक राजु चौधरी राज करल रहिट ।
संगीतमे मिठास खेलमे सहास यिहे हो यूवनके अभास, माधो, असरक डगरमे बा थारु गीतबाँसके पहिचान, भर्री कैलारीके गितकार स्वर्गिय पतिराम हुइट हमार शान कना मुल नाराके साथ हुइल प्रतियोगिताके मुख्य प्रयोजक कैलारी–१ हसुलिया निवासी हाल इजरायल बैठना विष्णु चौधरी ओ सहप्रयोजक कैलारी गाउँपालिकाको कार्यालय कैलाली रहल बा ।
प्रतियोगिताके प्रवद्र्धकमे कैलाली जिल्ला फुटवल संघ, सहकार्य योङ ब्वाइज क्लव, मुख्य व्यानर प्रायोजक एसएन एडभरटाइजिङ धनगढी, क्याम्पस रोड रहल बा । प्रतियोगितामे १३ ठो टिमके सहभागिता रहल बा । प्रतियोगिताके विजेता ४१ हजार ५ सय ओ उपविजेता २१ ह्जार ५ सय पैना आयोजक जनैले बा । उदघाटन खेल मोहना यूवा क्लव खोनपुर ओ पूर्णगिरी यूवा क्लव बसौटी विच हुइल रहे । उदघाटन कार्यक्रममे वडा नम्बर ३ के वडा अध्यक्ष सन्तराम चौधरी विशिष्ट पहुना रहिट ।
कार्यक्रममे किरण नेपालके अध्यक्ष अमृति चन्द्र चौधरी, योङ ब्वाइज क्लवके अध्यक्ष मुकेश बखरिया, इप्रका प्रमुख ऐनबहादुर पाललगागत स्वर्गिय पतिराम चौधरीके बाबा, बरापु, निम्हान गोतियार परिवारके सदस्यहुकनके सहभागिता रहे ।