धनगढी, २० पुस । थारु लेखक संघ नेपालसे स्थापित थारु साहित्य पुरस्कारके लाग स्रष्टासे प्रकाशित कृति ओ स्रष्टाके बायोडाटा आह्वान करगिल बा ।

पटेर्वा सुगौली गाउँपलिका–२, बेलवा, पर्सामे हुइना १०औं थारु साहित्य राष्ट्रिय सम्मेलनके अवसरमे पुरस्कृत करजैना पुरस्कारके लाग स्रष्टाके कृति ओ बायोडाटा आह्वान करल हो । अइना माघ १५ गतेसे १७ गतेसम हुइना १०औं थारु साहित्य राष्ट्रिय सम्मेलनके अवसरमे स्रष्टाहे पुरस्कृत तथा सम्मानके लाग स्रष्टाके कृति ओ बायोडाटा आह्वान करल संघके सचिव अनिल कुश्मी जानकारी डेलै ।

थारु लेखक संघ नेपालसे इ बरस २०८२ के लाग ६० राशीके पुस्कार डेना जनैले बा । पुरस्कारके लग स्रस्टालोग आपन प्रकाशित हुइल पोस्टा, बायोडाटा इहे पुस २४ गतेसम tlekhaksangh@gmail.com मे पठा पर्ना संघके सचिव कुश्मी जानकारी डेलै ।
थारु लेखक संघ नेपालसे स्थापित पुरस्कार अब्बेसम पाँच जनहनहे डेगैल बा । बर्दियाके शेखर दहित, दाङदेउखरके दोषहरण चौधरी, कैलालीके लक्ष्मी राना ओ सुनसरीके रामसागर चौधरीहे उ पुरस्कारसे पुरस्कृत हुइल जनाइल बा । ओस्टक गइल बरस बर्दिया, मयूरबस्तीके स्रस्टा सुशील चौधरीहे इ पुरस्कार डेगैल रहे । गैल बरस थारु साहित्य पुरस्कारके राशी ५० हजार रहे ।
ओस्टके थारु लेखक संघ नेपालके लग धनगढीके चन्द्र चौधरीसे स्थापित प्रतिभा महिला सशक्तिकरण पुरस्कारके राशी इ बरस ३० हजार कैगैल बा । अब्बेसम दाङदेउरखके मन्जिता चौधरी, बाराके शान्ति चौधरी ओ कञ्चनपुरके सुनिता चौधरी सानु सहित ३ जनहनहे इ पुरस्कार डेगैल बा । गैल बरस २५ हजार रहल इ पुरस्कारके राशी असौं ३० हजार बनाइल बा । इ पुरस्कार फेन १०औं थारु साहित्य राष्ट्रिय सम्मेलनके अवसरमे डेजैना जनाइल बा ।