७ फाल्गुन २०८१, बुधबार February 19, 2025

तीस वर्षदेखि सरोजलाई धनगढीगाउँको जिम्मेवारी

९ माघ २०८१, बुधबार
तीस वर्षदेखि सरोजलाई धनगढीगाउँको जिम्मेवारी

धनगढी, ९ माघ । धनगढी उपमहानगरपालिका–८, धनगढी गाउँका सरोज चौधरी तिस वर्षदेखि गाउँको नेतृत्व गर्दै आएका छन् ।
गाउँवासीले यस वर्ष फेरि चौधरीलाई सर्वसम्मतले भलमनसाको जिम्मेवारी दिएका छन् । थारू गाउँमा भलमनसाको पदावधि एक वर्षको रहने गरेको छ तर गाउँवासीको मन जित्ने गरी काम गर्दै आएका कारण कैलालीका एक भलमनसाले गाउँको नेतृत्व गरेको ३० वर्ष पुगेको छ ।
गाउँको भुराखेलले उनलाई ३० औँ पटक भलमनसा बनाएको स्थानीय सूर्य चौधरीले जानकारी दिए ।
“भलमनसा चौधरीले विगतदेखि नै गाउँमा राम्रो काम गर्दै आएका छन्,” उनले भने, “उनको गाउँको नेतृत्व गर्ने कार्यमा हामी सबैको चित्त बुझेकाले हरेक वर्ष उनलाई नै सर्वसम्मतले भलमनसा चुन्दै आएका छौँ ।”
भलमनसाले विकास निर्माणदेखि भोजभतेरमा नेतृत्व गर्ने, गाउँमा मेलमिलाप गराउने, विकास निर्माणको काम बाँडफाँट गर्ने र त्यस कार्यमा जनतालाई खटाउने लगायतका कार्य गर्दै आएका छन् ।
थारू समुदायमा भलमनसाले गरेको कामकारबाही चित्त नबुझेमा एक वर्षमै अर्को भलमनसा चयन गर्न सक्ने अधिकार गाउँवासीमा निहित रहने गर्दछ तर चौधरीले आफ्नोे गाउँवासीको चित्त बुझ्ने गरी काम गर्दै आएकाले उनलाई हरेक वर्ष यो जिम्मेवारी दिइँदै आएको छ ।
उनी २०५२ सालदेखि निरन्तर रूपमा भलमनसाको जिम्मेवारीमा रहँदै आएका छन् । गाउँ समाजमा आफूले निःस्वार्थ रूपमा बिनापारिश्रमिक सेवा गर्दै आएको भलमनसा चौधरीले बताए ।