धनगढी, २८ पुस । कैलालीके गोदावरी नगरपालिका थारु समुदायके सबसे बरवार टिहुवार माघ (माघी)के अवसरमे माघ २ गते सार्वजनिक बिदा डेना निर्णय करले बा ।
नगर कार्यालयपालिकाके पुस २५ गते बैठल १२१औं कार्यपालिका बैठकके निर्णय अनुसार माघके अवसरमे माघ २ गते बिदा डेना निर्णय करल हो । नगरपालिकासे एक सूचना जारी कैटी माघ २ गते गोदावरी नगरपालिका, नगर कार्यपालिकाके कार्यलय तथा मातहतके कार्यालय (अत्यावश्यक सेवा बाहेक) ओ शैक्षिक संस्थामे स्थानीय बिदा डेहल जानकारी कराइल बा ।
यहोर सुदूरपश्चिम प्रदेश सरकारसे माघ टिहुवारके अवसरमे पुस २९ गते सार्वजनिक बिदा डेना निर्णय करले बा ।
पश्चिम नेपालके थारु समुदायमे माघ टिहुवार पुस महिनाके अन्तिम दिनसे नै सुरु हुइना हुइल ओरसे प्रदेश सरकारसे सार्वजनिक बिदा डेना निर्णय करल हो । पुस अन्तिम दिन थारु समुदायमे बंगुर (जिता) मारके सामूहिक रूपमे टिहुवार मनैना प्रचलन रहल बा । प्रदेश राजपत्रमे फेन पुस २९ गते जिता पर्व कहिके उल्लेख रहल बा ।
माघ टिहुवारहे लावा बरसक मन्ना प्रचलन रहल थारु समुदायमे पुस अन्तिम दिनसे माघ १ ओ २ गतेसम विशेष रूपमे टिहुवार मनाजाइठ् । उ अवसरमे माघ १ गते राष्ट्रिय टिहुवारके रूपमे बिदा डेटी आइल बा । ओकरपाछे स्थानीय स्तरमे फेन सार्वजनिक बिदा डेटी आइल बा ।