७ फाल्गुन २०८१, बुधबार February 19, 2025

सार्वजनिक डेवालमे थारुहुकन ठाउँ नै डेगीलः महालोक गायक चौधरी

२७ पुष २०८१, शनिबार
सार्वजनिक डेवालमे थारुहुकन ठाउँ नै डेगीलः महालोक गायक चौधरी

दुर्जन कुमार चौधरी
धनगढी, २७ पुस । धनगढीके थारु छात्रवासमे बातचित घरके २७ औं श्रृखलामे थारु महालोक गायक मनिराम चौधरी धनगढीके बजार क्षेत्रमे रहल सार्वजनिक डेवालमे थारु गायक ओ कलाकारहुक्रनहे ठाउँ नै डेहल गुनासो व्यक्त करले बाटै ।
बातचित घरके २७ औं श्रृखलाके बरका पहुना समेत रहल चौधरी कैलाली जिल्लामे अग्रज थारु कलाकार, गायक, खेलाडी हुक्रे फेन बाटै । मने उहाँहुकनहे ठाउँ नै डेके उहाँसे पाछेक कलाकार, खेलाडीहुकनहे किल सार्वजनिक डेवालमे ठाउँ डेहल बात बत्वैलै । थारु समाजमे फेन राष्ट्रिय स्तरके खेलाडी, कलाकार बटै मने उहाँहुकने ओझेलमे पारगिल बा कना बात बत्वाइल रहिट ।


ओस्टके चौधरी सुदूरपश्चिम महोत्सवमे थारु गायक कलाकारहुकन २५ प्रतिशत फेन ठाउँ नै डेहल बात जिकीर करल रहिट । जेकर राजनीतिमे पहुँच बा, जेकर साली भातु बनदिदी बाटै उहाँहुकनहे किल सुदूरपश्चिम महोत्सवमे बिशेष ठाउँ डेहल चौधरी बटैलै ।
बातचित घरके २७ औं श्रङखलामे थारु महालोक गायक मनिराम चौधरी मै महालोक गायक नै हुँ, महिसे आउर थारु विद्धान पुर्खाहुक्रे बाटै, उहाँहुकन सक्कु बिधाके गीतबास पता हुइहीन । मोर गायन क्षमता, गीत सिरजैना क्षमता हेरके बिशेष करके थारु लोक गीत गैलक ओरसे महि महालोक गायक कहल हुइही उ अलग बात हो मने मै महालोक गायक भर नै हुँ कना बात बत्वाइल रहिट ।
बातचित घरके २७ औं श्रङखलामे महालोक गायक मनिराम चौधरी, उसु खेलाडी दिपक चौधरी, थारु मन्डरियाहुकन सम्मानित कैगिल रहे कलेसे थारु गायिका मनमति बखरिया ओ सानु चौधरी मघौता नाच नच्टी मुहसे रुपयाँ लुट्टी माघहे स्वागत करल रहिट ।
बातचित घरके २७ औं श्रङखलाके किसन्वा माधव थारु थारुहुकनके बरका टिहुवार, लाव साल, थारु सम्बत २६४८ सालके माघक अवसरमे माघक शुभकामना मन्तव्य व्यक्त करल रहिट । ओस्टके श्रङखलामे उपस्थित रहल विद्यार्थी, शिक्षक, टमान संघ संस्थाके प्रतिनिधीहुक्रे शुभकामना मन्तव्य व्यक्त करले रहिट कलेसे ठाकुर प्रसाद करियाप्रधानके घरगोसियाइमे बातचित घरके २७ औं श्रृखला निम्जल रहे ।